Hermund Tvedt
Hermund Tvedt (fødd 10. januar 1842 i Hyllestad, død 1. august 1925 i Jostedalen) var lensmann og gardbrukar i Jostedalen i Sogn og Fjordane. Han var gardbrukarson frå garden Tveit i Hyllestad i ytre Sogn.
Tvedt gjekk Underoffisersskolen i Bergen i 1860-åra. Han var sersjant då han gifte seg fyrste gongen 18.6.1871 med syskenbornet Kari Aslaksdotter frå Ås i Hyllestad. Dei felles besteforeldra deira var husmann Anders Simonson frå Utheim under Sørheim i Luster og kona hans. Dei budde i Hyllestad, men Kari døydde alt 30.12.1874.
Hermund Tvedt gifte seg opp att i Sogndal 3.9.1877 med Anna Christence Frettem (1847-1911). Ho var fødd i Bergen og var dotter av fanejunkar Guttorm Frettem og Malene Severine Børseim. Anna skal ha vore gift tidlegare med offiseren Hans Didrik Bakke frå Aurland. Hermund og Anna budde i Sogndalsfjøra til 1885 der han var sersjant og ho var jordmor.
Alt i 1882 hadde Tvedt vorte tilsett som lensmann i Jostedalen, og dei flytte til bygda etter at han 14.4.1885 fekk skøyte på Sperløyane. Tvedt var lensmann i Jostedalen til 1912 då Lars Stølen overtok.
Tvedt stilte til stortingsvala i 1891 for Moderate Venstre og 1894 for Høgre. Ved båe vala vart han suppleant medan Venstre-representanten, ordførar A. C. Ormbergstøl, vart valt til valmann og møtte på distriktsforsamlinga.
I 1887 tok han initiativet til Jostedal skyttarlag der han var formann dei tre fyrste åra.
Hermund hadde to born frå det fyrste ekteskapet med Kari:
- Andrea Elise (Lisa) Tvedt Veset (1872-1958)
- Sophia Alette Tvedt (1873-1897)
Anna hadde eitt barn frå det fyrste ekteskapet:
- Susanna Andrea Tvedt (1847-1917)
Hermund og Anna fekk sju born i lag:
- Carl Otto Tvedt (1878-1958), utvandra til USA
- Ingeborg Mathilde (Tilla) Tvedt
- Andrea Severine Tvedt (1881-1952), utvandra til USA
- Guttorm Tvedt (1883-1886)
- Ingeborg Tvedt (1885-1964)
- Guttorm Tvedt (Thomas Twedt) (1886-1941), utvandra til USA
- Simon Tvedt (1889-1970), som tok over heimebruket i Sperløyane
Litteratur og kjelder
- Hermund Simonsen Tvedt i folketelling 1865 for Bergen kjøpstad fra Digitalarkivet.
- Hermund S. Tvedt i folketelling 1900 for Jostedal herred fra Digitalarkivet.
- Hermund Simonsen Tvedt i folketelling 1910 for Jostedal herred fra Digitalarkivet.
- Laberg, Jon. (1939). Jostedal. Ei stutt utgreiding um bygdi og folket der. Tidsskrift utgitt av Historielaget for Sogn (nr. 10), 15-70. (Digital utgåve, Jostedal historielag)
- Øyane, Lars E. (1994). Jostedal sokn. Gards- og ættesoge for Luster kommune. (Bd. 5). Gaupne: Luster kommune, s. 188-189. Digital versjon på Nettbiblioteket.
Eksterne lenkjer
| Forgjengar: Lars Rasmusson Faaberg |
Lensmenn i Jostedalen |
Etterfølgjar: Lars Stølen |