Hermund Nilsson Bruheim
Hermund Nilsson Bruheim (fødd 15. august 1888, død 14. august 1962) var frå garden Vamberg i Jostedalen i Sogn og Fjordane. Han var son av bonde og bankkasserar Nils Hermundson Bruheim og kona Anna.
Hermund Bruheim gifte seg 16. juni 1914 med Elen Pedersdotter (1888-1920) frå Grov. Hermund tok over styringa av heimebruket Vamberg etter far sin i 1935 (skøyte 20. januar 1936) og budde her levetida ut.
Han tok òg over som kasserar i Jostedal sparebank etter far sin. Etter konkursen i Jostedal sparebank var han òg formann i forstandarskapet i eit år (1937-38). Han var kasserar i banken til han døydde, og då tok sonen Per Hermundson Bruheim over. Han var dessutan likningssjef i Jostedal kommune i ei årrekkje og ordførar i Jostedalen 1923-35 og 1936-37.
Bruheim var sentral i det fyrste kjende målmiljøet i Jostedalen, som stod bak skipinga av Jostedal mållag i 1906, og han var varamann til det fyrste styret i laget. Då han vart ordførar i 1923, fekk nynorsk det endelege gjennombrotet i bygdestyringa i Jostedalen.
Hermund og Elen fekk to søner i lag:
- Nils Hermundson Bruheim (1916-1983), som tok over heimebruket på Vamberg
- Per Hermundson Bruheim (1918-1974), kjøpmann og bankkasserar
Kjelder og litteratur
- Folketeljinga 1900 for Jostedalen
- Folketeljinga 1910 for Jostedalen
- Øyane, Lars E. (1994). Jostedal sokn. Gards- og ættesoge for Luster kommune. (Bd. 5). Gaupne: Luster kommune, s. 468. (Digital utgåve, NBdigital)
- Hoel, Oddmund L. (2006). Jostedal mållag 100 år. Jostedal skule- og bygdeavis (nr. 50), 88-89. (Digital utgåve)
| Forgjengar: L. R. Faaberg |
Ordførarar i Jostedal kommune |
Etterfølgjar: Hans Moen |
| Forgjengar: Hans Moen |
Ordførarar i Jostedal kommune |
Etterfølgjar: Ove Wangensten Haug |