Reina (Jostedalen)

Reina (Røysi) (Luster, gnr. 209/1) er eit gardsbruk i Krundalen i Jostedalen, Luster kommune. Bruket høyrer under matrikkelgarden Snøtun. Røysi sokna til Krundalen skule fram til krinsen vart nedlagd i 1963.

Røysi ligg rett vest for gamletunet på Snøtun og i tilknyting til gamletunet. Området som Røysi ligg på, var ein del av husmannsplassen Bakkane som vart rydda kring 1774 og utskild frå Snøtun i 1800.

Røysi vart så utskild ved at Bakkane vart delt i to jamstore partar 7. juni 1825. Lars Pederson Snøtun, som var son til brukaren i Bakkane, fekk då skøyte på Røysi mot å yte kår til foreldra (sjå meir under Bakkane).

Røysi har lege utsett til for snøskred. I mars 2002 vart eit snøskred liggjande nokre få meter vest for gardshusa, og etter det er det bygt ein stor rasvoll.

Kjelder og litteratur

• «Snethun» (bnr. 1) i folketeljinga 1910 (Digitalarkivet)
• Laberg, Jon. (1944). Jostedal. Ei stutt utgreiding um bygdi og folket der. Tidsskrift utgitt av Historielaget for Sogn (nr. 11), 5-85. (Digital utgåve, Jostedal historielag)
• Øyane, Lars E. (1994). Jostedal sokn. Gards- og ættesoge for Luster kommune. (Bd. 5). Gaupne: Luster kommune, s. 840-841. (Digital utgåve, NBdigital)