Sunnfjord kommune
Sunnfjord kommune i Vestland fylke blir skipa 1. januar 2020, i samband med Kommunereforma 2014-2018. Kommunane Førde, Naustdal, Jølster og Gaular vedtok i 2016 å slå seg saman, og dette vart godkjent av Stortinget i juni 2017. Den 19. desember 2017 bestemte Kommunal- og moderniseringsdepartementet at namnet skal vere Sunnfjord kommune.
Førde er den klart største tettstaden og blir administrasjonssenter i den nye kommunen.
Namnet
Dei fire kommunane vart ikkje samde om kommunenamnet. Førde og Naustdal ville helst ha Førde som nytt namn, medan Jølster og Gaular ønskte Indre Sunnfjord. Tidlegare hadde dei rett nok vore einige om at Sunnfjord kunne vere eit godt namn, og sjølv om Språkrådet ikkje rådde til dette alternativet då distriktet Sunnfjord omfattar eit større område, valde allikevel departementet dette som namn på den nye kommunen.
Kjelder og litteratur
- Regjeringa.no: «Sunnfjord blir namnet på den nye kommunen av Førde, Jølster, Gaular og Naustdal» (publisert 19. desember 2017).
- «Sunnfjord» i Store norske leksikon