Doro Heyerdahl

Doro (Dorothea) Heyerdahl (fødd på Voss 8. desember 1894, død i Oslo 25. april 1988) var folkeskule-, framhaldsskule- og folkehøgskulelærar. Den lengste samanhengjande delen av si yrkesgjerning hadde ho ved Lom og Skjåk framhaldsskule, med mindre avbrot frå 1925 til ca. 1950. Som det står i ei femtiårsomtale av henne, hadde ho i løpet av denne tida ”hatt en stor del av ungdommen i Lom og Skjåk som sine elever”. Og ho var ein svært avhalden lærar. Med bakgrunn frå universitet, lærarskule, folkehøgskule og ungdomslagsarbeid, og ved sitt elskelege og interesserte vesen, verka ”ho Doro” utan tvil som ein sterk inspirasjon for mange av desse ungdomane.