Jostedal samfunnshus

Jostedal samfunnshus i Jostedalen i Luster kommune er eit kommunalt samfunnshus, bygt 1986. Samfunnshuset er sentrum for det aller meste av den organiserte fysiske aktiviteten i Jostedalen og mykje av den kulturelle aktiviteten.

Dei eksisterande forsamlingshusa bygde i 1920-åra var ungdomshusa Dølaheimen, Framheim og Bergheim (nedlagd). Spørsmålet om eit større samfunnshus kom opp i 1970-åra, og Luster kommune sette 30. mars 1979 ned ei byggjenemnd med Jan Kåre Norberg som leiar. Byggjenemnda fekk utarbeidd teikningar og plan for bygget, men prosjektet vart deretter liggjande hjå kommunen

Kraftutbygginga frå 1984 var med på å få prosjektet på gli att, og i april 1985 tok byggjearbeidet til. Bygget vart lagt til området ved Jostdal skule på garden Bjørk og hadde ei kostnadsramme på 9,2 mill kr. Sommaren 1986 var bygget ferdig, og den offisielle opninga var 6. september 1986. I samfunnshuset vart det bygt storsal/gymnastikksal, matsal, kjøken og symjebasseng (12,5 m) med garderobeanlegg. I 1990 vart Jostedal barnehage bygt på i nordenden.

Dei største endringane i bygget sidan opninga skjedde hausten 2010 då det vart bygt ein klatrevegg (buldrevegg) på scenen i salen og kjøkenet vart toalrenovert.

Utanfor samfunnshuset ligg fotballbana som hausten 2009 fekk kunstgras. Same året vart det òg bygt ballbinge utanfor samfunnshuset. Her ligg òg to sandvolleyballbanar.

Ei lysløype i området kring skulen og samfunnshuset vart bygt alt i 1978. Løypa er seinare noko utvida til knapt 2 km, og i 2010 vart det gjort eit større arbeid med planering og utskifting av alle lysarmatur.

Samfunnshuset med symjebassenget har sidan opninga vore drive av Luster kommune.

Kjelder

• Jostedal skule- og bygdeavis nr 3 (1978), nr 6 (1980), nr 14 (1984), nr 17 (1985), nr 19 (1986)