Seksæring
Seksæring, trerø(r)ing, trerømming og trekeiping er nokre av dei mange namna på opne vestnorske tradisjonsbåtar med tre rorsrom utan mellomliggjande rom. Seksæringen blir rekna som den største småbåten. Med sine seks årar og ei lengd som ofte berre er ein fot eller to større enn store færingar får ein stor rorskraft, og seksæringen har da òg vore mykje bruka som skyssbåt — inkludert som postbåt og lensmannsbåt.
