Vis kilden til Olav P. Eidem Striefabrikk

'''[[Olav P. Eidem Striefabrikk|Olav P. Eidem]]''' tok i [[1941]] til med veving av fasongstrie i kjellaren i huset sitt på [[Eidem]] i [[Sykkylven]]. Råvare i strieproduksjonen under krigen var surrogatmaterialet, papirtråd. Tidlegare hadde naturstrie blitt nytta. I møbelframstillinga var strie eit viktig produkt. Stria vart nytta som underlag og mellomlegg i møbelstoppinga. Råmaterialet til naturstria kom frå utlandet, og under krigen stoppa tilførsla opp. Her låg det til rette for surrogatproduksjon.

Produksjonsutstyret som Eidem nytta var ein vevstol som var importert frå [[Tyskland]], og stolen vov strie i ei breidd på 1.80 meter. I verkstaden hadde Olav Eidem hjelp av brørne, Lars og [[Nils Eidem]]. Nils var utdanna teolog, men under nazistyret ville han ikkje praktisere som prest. Fram til krigen var slutt slo han seg på strieproduksjon i staden.

Stria leverte dei i rullar til møbelfabrikantar på Sunnmøre, og Eidem-brørne hadde ingen vanskar med å finne avtakarar. Skytlane i veven hadde god fart allereie første driftsåret. Etter krigen var det igjen råd å få tak i god naturstrie, og i 1946 vart strieverksemda lagt ned.

Frå 1947 laga Olav Eidem lenestolar i kjellarlokala sine. Han selde stolane direkte til butikkar i [[Bergen]] og [[Oslo]]. I 1950 valde han å slutte som sjølvstendig næringsdrivande. I staden tok han arbeid ved [[Vestlandske Møbler]] (Vestlandske Møbelfabrikk).

==Kjelde==
*[[Eldar Høidal|Høidal, Eldar]]: ''Industrisoge for Sykkylven''. Sykkylven 1990. {{nb.no|NBN:no-nb_digibok_2007081004004}}

{{DEFAULTSORT:Eidem Striefabrikk, Olav P.}}
[[Kategori:Sykkylven leksikon]]

[[Kategori:Tekstil- og bekledningsindustri]]
[[Kategori:Sykkylven kommune]]
[[Kategori:Etableringer i 1941]]
{{nn}}