Universitetet i Stavanger
Universitetet i Stavanger vart skipa den 29. oktober 2004, då Høgskolen i Stavanger fekk status som universitet. Den formelle opninga var den 17. januar 2005, ved kong Harald V. UiS vart då det femte universitetet i Noreg. Hovudområdet ligg på Ullandhaug i Stavanger, men eitt fakultet held til på Bjergsted. I 2023 var det drygt 12 000 studentar og 1926 tilsette, fordelt på seks fakultet.
Historie
UiS sin historie går attende til 1969, då Rogaland distriktshøgsskole vart skipa. I 1975 flytta det til Ullandhaug. Distriktshøgskolen vart i 1986 slått saman med Stavanger ingeniørhøgskole, og vart til Høgskolesenteret i Rogaland.
I 1994 fusjonerte seks statlege og ein privat høgskole til Høgskolen i Stavanger (HiS). Dette var:
- Høgskolesenteret i Rogaland.
- Norges hotellhøgskole.
- Stavanger lærerhøgskole.
- Rogaland musikkonservatorium.
- Sosialhøgskolen i Stavanger.
- Stavanger sykepleierhøgskole.
- Den norske kirkes menighetshøgskole.
HiS fatta i 2000 eit vedtak om å verte eit universitet i løpet av dei neste fire åra. Eit krav er å ha fire program for doktorgradar. To var på plass, og i juni 2003 kom dei to neste. Søknad vart sendt inn, og etter kvart vart den godkjend av Kongen i statsråd.
Struktur
UiS har seks fakultet, de fleste med fleire insitutt under seg:
- Fakultet for utdanningsvitenskap og humaniora.
- Det samfunnsvitenskapelige fakultet.
- Det teknisk-naturvitenskapelige fakultet.
- Fakultet for utøvende kunstfag.
- Handelshøgskolen ved UiS.
- Det helsevitenskapelige fakultet.
I tillegg ligg Arkeologisk museum i Stavanger under UiS.
Kjelder og litteratur
- Universitetet i Stavanger på Wikipedia på bokmål og riksmål.
- Universitetet i Stavanger, UiS sin heimeside.