Fredsdagane 1945 i Volda
Fredsdagane 1945 i Volda starta om ettermiddagen 7. mai da meldinga om den tyske kapitulasjonen nådde bygda og kyrkjeklokkene begynte å kime. Flagg etter flagg vart heiste og russen samla seg for å gå i tog. I gatene der toget passerte leita folk fram gamalt russeutstyr og kasta ut slik at fredsrussen snart var fullt utstyrte med huver og stokkar. Gatene vart raskt fylte av folk som samla seg framafor Olaisenhuset i Gatå der ein radio vart sett fram i eit ope vindauge slik at nyhenda kunne høyrast.
Dagen etter, den offisielle fredsdagen, var veret i Volda strålande, og den offisielle høgtidinga tok til med ein times klokkekiming frå kyrkja kl 16. Volda hornmusikk, speidarane, skulane og lag og foreiningar gjekk deretter i tog frå skuleplassen på Hauane, inn til Rotset og attende til Uppheimsplassen.
Deretter samla russen inn blendingsgardiner og «unorske skrifter og bilete til autodafe[1]». Bålet vart tent på idrettsplassen kl 24 av lensmann Mathias Steinsvik etter tale av ein av russen. Jostein Nerbøvik skriv at hending var mest som «ei rituell handling».
Dagen etter - 9. mai - var det så omsider fotballkamp mellom dei gamle rivalane Volda og Ørsta att, der Volda vann 4-0!
Kjelder
- Nerbøvik, Jostein 1996: Krigsår og motstandsvilje 1940-1945. Volda kommune s. 349-51.
Referansar
- ↑ Nerbøvik 1996 s. 350. Autodafe tydar offentleg, rituell brenning.