Kulturminne langs Sognefjorden: Forskjell mellom sideversjoner

Kryssar du over til austsida av Sogndalsfjorden, ser du nokre vakre holmar. Holmane er ikkje berre kulturhistorisk sentrale på grunn av slaget ved Fimreite. Dei er òg ein attraktiv møteplass for sjøfugl. I tida frå 1. april til 31. juli er det forbode å gå i land og ferdast på alt landareal her og i ei sone ut til om lag 50 meter frå land.

Meisen med fyrlykta på neset er ein spennande stad mellom Fimreite og Haugaviki. Det er ideelt å gjere strandhogg, og sola er lenge oppe om sommaren. Frå Meisen kan du krysse Sognefjorden under spennet over til Kongaleget.

På sørsida av Sognefjorden, mellom Fresvik og Feios, finst det ein mørk og kald stad under det stupbratte henget. Her blir det sagt at Magnus Erlingsson låg og venta på det rette tidspunktet for å slå til mot kong Sverre. Magnus hadde høyrt at Sverre var i Sogndal for å slå ned eit opprør som hadde teke livet av to sysselmenn.

Borlaug er startarena for Sognefjord Challenge, ei kryssing på 3,7 km for symjarar med følgjekajakk under Sognefjord Swim Festival. Kaien vart nyleg restaurert av grunneigar Leif Eikeland. Før i tida hadde bøndene på Njøs i Leikanger slått graset her. Fram til 1992 høyrde området til Leikanger kommune; i dag høyrer det til i Vik kommune.

Padlar du vestover frå Borlaug kjem du til Feios skule, kloss i fjorden. Her er det mykje liv under opninga av Sognefjord Swim Festival i august. Feios er ei triveleg, lita bygd med ca. 240 innbyggjarar.

Ved munninga av Feioselvi ligg butikken i Osen, som bygdafolket er flinke til å hegna om. Her ligg òg ein gamal dampskipskai. To gamle stover i berget over butikken, Astridstova og Randistova, går attende til 1700-talet. Vil du vite meir om bygda, berre spør på Feiosbui!

Vestover frå Feios passerar du eit relativt nytt hamneanlegg. Det blei bygd for å henta ut dei store tømmerressursane i denne delen av fjorden. Hamna er òg ein god fiskeplass!

Padlar du et par kilometer frå tømmerkaien, vil du finne ein gamal lakseplass. Her stod eit lakseverp før. Laksehytta står framleis, og restane etter fangstanlegget ligg i fjøra.

Om du vel å fylgja fjordkysten frå Vangsnes til Vik, flyt du forbi fleire flotte campingplassar og nyare sjøbuer. Ved Vikøyri kan du stiga i land og utforska kulturminne i dusinvis. Den gamle strandsitjarplassen er godt ivareteken. Lenger innover i bygda finn du Hopperstad stavkyrkje og Hove steinkyrkje, som begge er frå 1100-talet.

Etter ein stopp i Vik, kan ein padle utover Vikjabukti til Liktvorane. Under andre verdskrig hadde tyskarane ein vaktstyrke på 8.10 mann på Liktvorane. I 2004 stranda fjordsymjaran Lewis Gordon Pugh her etter ein forsøk på å krysse Sognefjorden frå Vangsnes til Målsnes.