Eidsborg Ungdomslag

Eidsborg Ungdomslag i Tokke blei skipa i 1909 og er framleis aktivt.

Historikk

Den fyrste formannen i Eidsborg Ungdomslag var Eivind Gjermundsen Kleppo. Frå byrjinga hadde ikkje ungdomslaget nokon fast møtestad, men samla seg i skulestova eller på gardane i Eidsborg. I årsskiftet 1918/19 fekk laget eige hus som vart kalla "Ravnegjuv".

Aktivitetane i laget var frå byrjinga av å få til underhaldning for ungdomen på laurdagane. Laget arrangerte festar med spelemenn og friluftsaktivitetar. Mellom anna vart det skipa til skirenn i Vindlausbakken i Eidsborg. Amatørteatret hadde også ein brei plass i laget. I 1914 fekk Eidsborg Ungdomslag sitt eige handskrivne blad, "Gauken".

På midten av 1960-talet var det lite aktivitet i laget, men utover 1980-åra vart aktiviteten tatt opp at.

I dag har ungdomslaget samlingsstad i kjellaren på grendehuset i Eidsborg.

Arkiv

Arkivet etter Eidsborg Ungdomslag er ordna ved Vest-Telemark Museum. Oversikta over arkivet finn ein på arkivportalen.

Kjelder og litteratur

• Lillegård, Mette: «Eidsborg Ungdomslag 1909–2009» i Årsskrift (Tokke historielag). 2009. Digital versjon på Nettbiblioteket.