Møre og Romsdal husflidslag
Møre og Romsdal husflidslag blei stifta i 1986 og er tilslutta Norges Husflidslag. Organisasjonen at om lag 1500 medlemmer fordelt på 32 lokallag. Fylkeslaget har 11 husflidshandverkarar og fire husfliden-butikkar.
I Møre og Romsdal eksisterte det fram til 1986 tre separate fylkeslag, Sunnmøre Husflidslag, Nordmøre Husflidslag og Romsdal Husflids- og småindustrilag. Desse 3 laga vart i 1953 på oppmoding frå Norges Husflidslag bedne om å danne eitt fylkeslag eller ei fylkeshusflidsnemnd. Det var danna ei nemnd som bestod av 3 medlemmer med personlege varamenn, - ein frå kvart lag. Nemnda hadde som si viktigaste oppgåver å fordele det statlege tilskotet. I 1954 var tilskotet på kr 5500 som vart fordelt etter forholdet 3-2-2, med 3 delar til Sunnmøre og 2 delar til kvar av dei andre to laga.
I 1963 vart det danna eit fylkeshusflidslag til erstatning for fylkeshusflidsnemnda som vart vedtatt oppløyst i 1961. Dei 3 distriktslaga eksisterte parallelt med det nye laget, Møre og Romsdal Fylkeshusflidslag, som vedtok nye lover i tråd med normalvedtektene for fylkeshusflidslag.
I åra fram til 1979 arbeide fylkeshuslidslaget hovudssakleg med fordelinga av statstilskot, val av utsendingar til landsmøta og fylkesleiarmøta. I 1979 vart det for fyrste gong søkt om tilskot til vaksenopplæringskurs.
I 1980 kom det forslag frå Kristiansund Husflidslag om å slå saman dei 3 distriktslaga. Men distriktslaga på Sunnmøre og Nordmøre fann dette vanskeleg på grunn av studiearbeidet.
I 1985 vart det teke opp at ein ynskte å få ein eigen husflidskonsulent for fylket. Hittil hadde ein felles konsulent saman med begge trøndelagsfylka, og i 1986 vart det for fyrste gongen løyvd pengar til stillinga. Samstundes vart dei statleg midlane til fylkeslaga inndregne, og fylkeslaga måtte heretter bli sjølvfinansierande. Det vart difor vedteke å søke om økonomisk støtte til drift av laget og til sekretær hos fylkeskommunen. Fylkeslaget fekk eit tilskot kr 25.000.
I 1986 vart dei 3 distriktslaga lagt ned og i staden fekk ein eitt felles lag for fylket, Møre og Romsdal Fylkeshusflidslag. Det vart danna på eit konstituerande årsmøte 21.juni 1986. I § 1 i vedtektene for fylkeshusflidslaget heiter det: ”Møre og Romsdal Fylkeshusflidslag skal arbeide for å fremja god norsk husflid, kulturelt, sosialt og økonomisk.”
Lokallag
- Aukra husflidslag
- Averøy husflidslag
- Eresfjord husflidslag
- Frei husflidslag
- Fræna husflidslag
- Giske husflidslag
- Haram husflidslag
- Hareid og Ulstein husflidslag
- Herøy og Sande husflidslag
- Kristiansund husflidslag
- Midsund husflidslag
- Molde husflidslag
- Måndalen husflidslag
- Norddal husflidslag
- Rauma husflidslag
- Rindal husflidslag
- Storfjord husflidslag
- Straumsnes husflidslag
- Sula husflidslag
- Sunndal husflidslag
- Surnadal husflidslag
- Sykkylven husflidslag
- Tingvoll husflidslag
- Tustna husflidslag
- Vanylven husflidslag
- Vestnes husflidslag
- Veøy husflidslag
- Volda husflidslag
- Ørskog husflidslag
- Ørsta husflidslag
- Ålesund husflidslag
- Ålvundeid og Ålvundfjord husflidslag
Kjelde
- Møre og Romsdal husflidslags hjemmeside
- Andenes, Gunnar (red.): Volda husflidslag 100 år: 1906-2006, Volda 2006.