Talgsjøen
Talgsjøen (uttale: [tʰɑɽgʂy:n] nominativ/akkusativ, [tʰɑɽgʂy:no]/[tʰɑɽgʂy:a] dativ), stundom skrive Talgsjyen eller Talgsjy’n etter uttalen, er eit ope havstykke mellom Golmøya, Straumsnes, Frei og Nordlandet i Kristiansund på Nordmøre. Talgsjøen ligg ved utløpet av Vinjefjorden, Halsafjorden og Tingvollfjorden/Sunndalsfjorden. Mot storhavet grensar Talgsjøen mot Grip og Griphølen i nord og nordvest og Edøyfjorden og Trondheimsleia i nordaust.
Segn
På Tustna har det blitt fortalt ei segn om korleis Talgsjøen fekk namnet sitt. Versjonen nedanfor er for det meste henta frå boka Tustna før og no, band 2:
I "Omnan" på Nordlandsøya heldt det til røvarar som gjorde leia utrygg både for tustningar og andre.
Ein dag var røvarene på toget innover fjorden for å skaffe seg ferskt kjøtt. Dei hadde med seg eit kvinnfolk, henne hadde dei røva på ei ferd tidlegare. På turen fekk dei tak i ei kvige og slakta den. Kvinnfolket såg seg høve til å ta til seg "nikjå" i dyret. På ein papirbit krota ho ned nokre ord om si skjebne og om tilhaldsstaden til røvarane. Ho rulla talgen omkring papiret og la det frå seg , slik at det flaut bort når det vart flo sjø.
Denne talgrullen dreiv i land på vestsida av Golmøya, og dette funnet ga namnet på Talgsjøen. Etter dette vart røvarane i "Omnan" arresterte.
Kjelder og litteratur
- Talgsjøen på Wikipedia på nynorsk.
- Fugelsøy, Maurits. Tustna før og no. 2. Utg. Tustna historienemnd. no. 1960. Digital versjon på Nettbiblioteket.