Folkemusikkarkivet for Møre og Romsdal

Felespelemannen Johannes Olson Valen (ca 1820–1909), òg kjent som «Espvik-Sanden», frå Aure på Nordmøre.

Foto: John Danielsen Bergfall (1822–1901)

Folkemusikkarkivet for Møre og Romsdal er ei stifting mellom fem partar: Møre og Romsdal fylkeskommune, Høgskulen i Volda, Møreforsking Volda, Møre og Romsdal Folkemusikklag og Noregs Ungdomslag i Møre og Romsdal. Oppgåvene er:

• å samle og bevare folkemusikk i alle uttrykksformer
• å gjere folkemusikken tilgjengeleg for alle interesserte
• å fremje bruken av folkemusikk
• å samle og gjere tilgjengeleg kunnskapen om folkemusikkmiljøa, tradisjonane og tradisjonsberarane
• å skape ny kunnskap om folkemusikk, særleg musikken i Møre og Romsdal

Arkivet samlar lydopptak av nolevande og tidlegare utøvarar av folkemusikk, skaffar til veges noteoppskrifter, biletmateriale, munnleg og skriftleg tradisjon og faglitteratur om folkemusikken i Møre og Romsdal. Arkivet er eit viktig serviceorgan. Studentar, aktive folkemusikarar og andre interesserte kan få tilsendt lyd- og notekopiar for studieføremål, eller få rettleiing og hjelp til oppgåver. Leiinga ved arkivet set i gang tiltak for å fremje interessa for folkemusikk gjennom foredrag, musikkinnslag, seminar m.m.

Arkivet har kontor ved Høgskulen i Volda. Jon Tvinnereim er leiar for styret i 2010.

Kjelde

• Om folkemusikkarkivet på www.hivolda.no