Li Simon (1927–2017)
Li Simon (fødd 21. juli 1927 i København, død 8. september 2017 på Ål) var skinnfellmakar og designar. Ho hadde i ulike periodar verkstad i Hemsedal, Ulefoss, Sømna og på Gol. I tillegg restaurerte ho 17 gamle hus, dei fleste av dei på Skinnfellgarden i Hemsedal.
Oppvekst i Danmark
Li, som er ei forkorting for Annelise, vaks opp med det ho kalla “en genial alene-far”.[1] Han døydde då ho var berre ti år gamal, men på dei åra ga han henne ein styrke som ho bar med seg “både da og senere gjennom hele livet”.[1] Ho hugsa han som ein klok mann, som mellom anna lærte henne at: “Vil du fly, så må du først gro vinger.”[2] Som tiåring kom Li på barneheim.
Virke som skinnfellmakar og designar
I 1952 braut Li av historiestudia ved Københavns Universitet og flytta til Hemsedal med den tyske musikaren og pedagogen Vult Simon, som hadde kome til Noreg på 1920-talet. Paret busette seg på Veneli (90/34) og fekk borna Martin (f. 1954) og Vita (f. 1958). I tillegg var Li i 15 år pleiemor for ein utviklingshemma gut. Garden tok også i periodar imot innsatte som var ute på prøve frå kvinnefengslet i Oslo.
På Veneli og Veneholtet (90/60), som dei seinare kjøpte attåt, bygde Li og Vult opp eit tun med gamle hus frå ulike delar av Hallingdal, som dei restaurerte. Her starta dei i 1961 verksemda Skinntrykk, og garden kalla dei etter kvart Skinnfellgarden. Garden vart med åra ein attraksjon, dit det kom busslastar med turistar frå inn- og utland.
For Li vart bevaringa av gamle tømmerhus og av tradisjonen med å laga skinnfellar ei livsoppgåve. Skinnfellane var framleis i bruk då ho kom til Hemsedal, men handverkstradisjonen var i ferd med å verta gløymd. Saman med mannen, byrja ho å samle kunnskap om skinnfellmaking og leite fram gamle skinn og trykkstokkar på gardar og i museum. Dei eldste stokkane dei fann hadde teikningar med typiske helleristingsmotiv, og det eldste skinnet dei fekk til samlinga si var meir enn 200 år gamalt.
Utgjevingar
- Skinnfellboka. Utg. Orkana. Stamsund. 2000. Digital versjon på Nettbiblioteket.
- Fager og fullhåret var fellen Husflid i et økologisk perspektiv. Utg. Norges husflidslag. Oslo. 1995. Digital versjon på Nettbiblioteket, s. 51-54.
Fotnotar
Kjelder og litteratur
- Aftenposten 1978.01.19. 19780119. Digital versjon på Nettbiblioteket.
- Aktuell. Utg. Ukebladet aktuell. Oslo. 1965. Digital versjon på Nettbiblioteket, s. 8-12
- Brønnøysunds Avis 1995.05.20. 19950520. Digital versjon på Nettbiblioteket.
- Dølaminne. Utg. Hallingdal historielag. Ål. 2011. Digital versjon på Nettbiblioteket.
- Frå skysstasjon til alpinsenter. Utg. Hemsedal historielag. 2003. Digital versjon på Nettbiblioteket.¨
- Hallingdølen 2017.09.12. 20170912. Digital versjon på Nettbiblioteket.
- Hedlund, Gerhard: Lille Ulefos og sagbrukssamfunnet. Utg. Genius. 1995. Digital versjon på Nettbiblioteket.
- Håndverkere 1994. Utg. Håndverksregisteret. 1993. Digital versjon på Nettbiblioteket.
- Flaten, Hans: Hemsedals slektshistorie 1693-1975. Utg. Kommunen. 1976. Digital versjon på Nettbiblioteket.
- Lavangsminne. Utg. Krambuvika bygdemuseumslag. 2000. Digital versjon på Nettbiblioteket.
- Oppegård husflidslag. Utg. Laget. 2003. Digital versjon på Nettbiblioteket.
- Simon, Li: Skinnfellboka. Utg. [V. Simon]. Gol. 2011. Digital versjon på Nettbiblioteket.