MB «Joffre» M 13 VA

«Joffre» M 13 VA eller «Stylkå/Joffå»: Klinkerbygd kutter i tre. Bygd i 1914 med desse måla: 37,5 / 11,6 / 5,5 fot. Motor: Volda 18 HK, 4-takt, semidiesel (glødehaud- eller oppfyringsmotor) frå 1914. Kjøpt av Årset notlag 3. jan 1952. Ved kjøp var notlaget klar over at båten var dårleg og måtte reparerast. Saumen var dårleg og det var rote i hekken. Båten skulle på slipp ved Volda Mekaniske Verkstad. Den vart lagd på Volda hamn kvelden før, her sokk den og det vart eit styr med heving og slippsetjing. Reparasjonen var oppattklinking, avsaging av hekk, isetjing av spegel og ombygging av rekkeliningen ned på spegelen. Dette vart ein svert vellukka konstruksjon til notbruk. «Joffre» vart lett å entre frå småbåtar. Etter ombygging var båten ca. 35 fot lang.
Det var ikkje til å unngå at båten fekk namnet «Stylkå» (ei høne som har misst vølefjørene) av oppfinnsome tilsette på Volda Mek. Motoren vart bytt eit år etter kjøp grunna slitasje og driftsproblem. No vart innsett ein brukt Volda, 22 HK kjøpt med Gerhard Kvalsvik, Herøy. Alle desse 22 HK-motorane hadde same problem, kjølevasspylinga sleit hol i sylindarveggen og det lak kjølevatn inn i sylindaren med motor-reparasjon som resultat. Dette skjedde her og på tur ut Voldsfjorden.
I notlaget vart båten brukt til snurpenota der nota låg framom rorhuset på ein flake i heile båten si breidd. Der var 2 – 3 tommar mellom dekk og flaken. På styrbord hjørne av rorhuset stod ein rull som verna ved setjing av not. Båten var bygd som kutter med «svinerygg» og ein romsleg lugar med lugarkappe framme.
Nota vart teken inn att med motordriven høg «sute» på styrbord side, derfor var det lett og godt å arbeide med nota. Der var frå før eit vanleg mekanisk spel med «lineskive» og «kopp» drive av framdriftsmotoren.
Ein leigde eit Atlas ekkolodd med turt papir med Karl (Kalle) Årset i 1953 og 1954 og hadde det i «Lissjeveren» M 20 VA fyrste året, det vart kjøpt og montert i «Joffre» då den kom i drift.
Etter kvart vart dekket og rekkestøttene dårlege / opprotne og båten vart dregen på land ved nothuset, der låg den til den vart brend ca. 1965. Den vart utbytt med «Tempo» M 114 VA. Er ein av innkjøpte båtar til Volda kommune som ikkje vart omregistrerte i Register over merkepliktige norske fiskefarkostar ved overføring frå Sande til Volda.

Kjelder og informantar

• Austefjord Museum/Fiskebåtregisteret
• Austefjord Museum/Heftet: Notfiske i Austefjorden
• Aarset, Hans f. 1936