Marlostrædet: Forskjell mellom sideversjoner

'''[[Marlostrædet]]''' (gnr. 57.5) er eit småbruk i [[Skjåk]]. Det var husmannsplass under gnr. 57.1 Nedre Marlo ([[Skjåk prestegard]]) til 1924, da brukaren fekk kjøpt det til sjølveige. Plassen er fyrst nemnd i kjende kjelder i 1826. Da vart det inngått [[Kjeldearkiv:Husmannskontrakt, Marlo i Skjåk 1826|kontrakt]] mellom plassmannen Johannes Olsen og husbonden Kristen Rasmussen Marlo. Ordlyden i kontrakten synest vise at Johannes var den fyrste husmannen i Marlostrædet. Det peikar i same retning at Johannes er den fyrste som står oppført under Marlostrædet i ''Ættebok for Skjåk'' (band I side 176).  

== Plassfolka Johannes Olsen og Anne Eilevsdotter 1826-1868 ==

Johannes var i følgje ætteboka  fødd i 1793, der han er oppført som «Johannes Olsen Mallaug». Det har ikkje lykkast å finne han blant dei døypte i kyrkjeboka 1792-1794. Folketeljingane 1865 og 1875 fortel at han var fødd i [[Lom]] ([[Garmo]] sokn) i 1792. Johannes var iallfall om lag 33 år gammal da han tok til i Marlostrædet. Han var gift med Anne Eilevsdotter, som i følgje ætteboka var frå [[Roen]] i Skjåk.

== Plassfolka Eilev Johannesen og Anne Haldogsdotter 1868-1900 ==

Eilev gifta seg i 1855 med Anne Haldogsdotter frå [[Lesja]] (1835-1918). Dei fekk i alt ni born i tidsrommet 1852-1877. Eldste barnet var i følgje folketeljinga for 1865 fødd i [[Molde]] eit par års tid før foreldra gifta seg. Alt tyder på at Eilev har reist utanbygds ein periode for å søkje levebrød, og at han undervegs altså skaffa seg både kone og born.  

== Plassfolk og sjølveigande småbrukarar Johannes Eilevsen og Eldri Olsdotter 1900-1929 ==

Johannes og Eldri dreiv plassen som husmannsfolk til 1924, da dei fekk kjøpt han til sjølveigd småbruk, gnr. 57.1 Marlostrædet.  

Elles var Johannes skomakar av yrke. Allereie i 1875 er det notert i folketeljinga at han delvis ernærte seg som skomakar. Han var da 17 år gammal. Han levde til 1929.  

== Guttorm og Johan ==

Etter at Johannes døydde, var det to ugifte søner av Johannes og Eldri, Guttorm (fødd 1902) og Johan (fødd 1909) som tok over småbruket. Dette levde dei av attått anna arbeid til dei vart pensjonistar og døydde i 1970-80-åra.  

Etter at Guttorm og Johan vart borte, stod Marlostrædet folketomt i ein del år. I seinare tid har det kome nye folk som har modernisert stova og gjort det til ein moderne villa.

== Kjelder ==

* Hosar, Hans P.: ''Skjåk bygdebok band 3'', Skjåk kommune 1998.

* Husmannskontrakter for Marlostrædet [[Kjeldearkiv:Husmannskontrakt, Marlo i Skjåk 1826|1826]] og [[Kjeldearkiv:Husmannskontrakt, Marlo (prestegarden) i Skjåk 1868|1868]]

* Jordbruksteljinga 1939 for Skjåk (i Riksarkivet: Statistisk Sentralbyrå, Jorbruksteljinga 1939 pk. 70)

* ''Ættebok for Skjåk'', band I og II. Utg. av Skjåk Historielag 1946 og 1969.