Ole Ingebrigtsen Strømme

Ole Ingebrigtsen Strømme (1876–1936) frå Strømmebruket i Straumgjerde var lærar og gardbrukar og ein typisk representant for den utdanna lærarstanden kring det førre hundreårsskiftet. Som så mange av dei, kom han frå enkle kår. Etter utdanning reiste han tilbake til bygda han kom frå. Han la ned eit stort og idealistisk strev i ungdomslag og skule. Innsatsen vart lagt merke til og han fekk ein karriere heilt til topps i det norske samfunnet.

Han hadde si lærarutdanning ved Stord seminar, der dei frilynde verdiane stod sterkt. Han vende tilbake til heimbygda og heimegarden, gifte seg og fekk familie. Han tok over eit bruk der storparten av jorda var udyrka. Men som den interesserte gardbrukar han også var, gjekk han laus og braut jord. Då han gav frå seg garden til sonen, Inge Strømme, 30 år seinare, var det meste av jorda dyrka.

Lærar i Sykkylven var han frå 1897 til 1919 og det var særleg i denne perioden han gjorde seg gjeldande både som initiativtakar og leiar i ungdomslaget og som leiar i byggjekomiteen for ungdomshuset Vårvon. Frå 1911 var han også ordførar i Sykkylven og blant dei som gjorde opptakta til Sykkylven kommunale kraftverk som stod ferdig i 1919. Han gjorde ein stor innsats i lokalpolitikken og sat som medlem i ei rekkje utval og råd. Frå 1919 var han lensmann for Ørskog og Sykkylven. I 1931 vart han vald inn for Venstre på Stortinget. Året etter sat han som sosialminister i Mowinckels tredje regjering.

Kjelde:

Gardssoge for Sykkylven, bd. 2.