SVD-Sámiid Vuorká-Dávviriid musea- ja historjásearvi Kárášjogas

SVD-Sámiid Vuorká-Dávviriid museasearvi Kárášjogas Lenketittel

SVD Museasearvi áŋggirda báikegottehistorjjálaš dokumentašunbarggu ovdii, mii berrešii leat SVD:ain ovttasbargu. Dáhtošeimmet hukset kulturmuitosuodjaleapmái ja sámi kulturárbái vuogádagaid mat fátmastit báikkálaš áŋggirdeaddjiid. Ollu museabarggut leat musea- ja historjáservviid eaktodáhtolaš bargguid duohkin.

Báikkálaš museasearvi ásahii ja doaimmahii museadoaimma Kárášjogas 1930-logu loahpageahčen. Museasearvi vuođđuduvvui 1939. Ovdal nuppi máilmmisoađi lei dávviriid čohkken doaimmahuvvon moadde jagi, ja muhtun priváhta dálus dollui dávviriid čájáhus. Máŋga sámi serve dán bargui, ja sámit leat leamaš sakka beroštuvvan museaásahusa ceggemis Kárášjogas. Priváhta olbmot leat geigen máŋga kulturhistorjjálaš dávvira SVD:ii, skeaŋkan dahje buhtadusa vuostá. SVD mihtilmas museaviessu rahppui 1972:s. Ovdal go museaviessu ceggejuvvui, bulii Sámiid Álbmotallaskuvlla dávviriid vuorká. Dávviriid gádjo, muhto váldobeavdegirjjit dušše.

Museasearvi lea vuođđudan SVD ásahusa, ja lea danin álggahan ja čuvvon ásahusa jođiheami álggu rájes. Dál eaiggátstivra fuolaha SVD beroštumiid, masa SVD museasearvvi jahkečoahkkin vállje miellahtuid. 2010-2014 eaiggátstivra: Jođiheaddji Ragnhild Nystad, Brita Kåven ja Thoral Henriksen. Museasearvi lei mielde vuođđudeamen BEASI Doaibmadálu Kárášjogas 2006 ja lea 2008:s searvan dása: Norgga Landslaget for lokalhistorie.

Doaibma

• Kárášjoga báikkálaš historjjá ja kulturárbbi lágideamit, seminárat ja kurssat • Dokumentašunbargu lea álggahuvvon Kárášjoga jahkegirjin 2009 ja 2010 • Oččodat joatkašuvvot Kárášjoga historjágirjebarggu maŋŋil jagi 1900 ja Kárášjoga sohkagirjji ođasmahttima • Lágidat Kulturmuitobeaivvi ovttas Kárášjoga gielddain • Kultuvrralaš ovttasbargu birrasiiguin Kárášjoga ustitvuođagielddas Lujávrris • Oalgálagaid SVD eaiggátstivrrain ovddidit SVD beroštumiid

Stivralahtut 2010

Jođiheaddji Gudrun E E Lindi, nubbinjođiheaddji Thoralf Henriksen, čálli Else Marie Isaksen, ruhtadoalli Nils Anders Bieska, stivralahttu Arne Nystad. Várrelahtut: Ragnhild Nystad, Piera Mosebakken, Anveig Nordsletta.

Čujuhus: c/o Gudrun E E Lindi, P.b. 67, 9735 Kárášjohka, tel. (+47) 78 46 73 32 / 959 35 626 E-poasta: gudrun.lindi@trollnet.no Neahttasiidu: www.beassi.org

Ulbmil

Museasearvvi ulbmilin lea gáhttet sámi identitehta, giela ja kulturárbbi, ee. doarjjodettiin Sámiid Vuorká-Dávviriid vuođđudusa museabarggu.  

Lahttovuohta

Ovttaskas olmmoš dahje lihttu gii dáhtošii ovddidit searvvi ulbmila, sáhttá searvat lahttun. Miellahttovuohta máksá 100 ru jahkái. Mávsse báŋkokontoi: 7593 05 03371.

Gáldu:

Julius-Iŋggá Gudrun Eliissá/Lindi, Gudrun E E: 70-jahkásaš ealáskan. Kárášjoga jahkegirji/Karasjok årbok 2009, s. 4-7. 

Lindi, Gudrun E E: Museumsforeninga i Karasjok 70 år – Samiske kulturminner i fokus, Lokalhistorisk Magasin 4-2009, s. 26-28

Teigmo, Mari: Sámiid Vuorká-Dávvirat – De Samiske Samlinger som samisk kulturinstitusjon (1976)