SVD-Sámiid Vuorká-Dávviriid musea- ja historjásearvi Kárášjogas
SVD-Sámiid Vuorká-Dávviriid musea- ja historjásearvi Kárášjogas áŋggirda báikegottehistorjjálaš dokumentašunbarggu ovdii, mii berrešii leat SVD:ain ovttasbargu. Dáhtošeimmet hukset kulturmuitosuodjaleapmái ja sámi kulturárbái vuogádagaid mat fátmastit báikkálaš áŋggirdeaddjiid. Ollu museabarggut leat musea- ja historjáservviid eaktodáhtolaš bargguid duohkin.
Báikkálaš museasearvi ásahii ja doaimmahii museadoaimma Kárášjogas 1930-logu loahpageahčen. SVD Museasearvi vuođđuduvvui 1939. Ovdal nuppi máilmmisoađi lei dávviriid čohkken doaimmahuvvon moadde jagi, ja muhtun priváhta dálus dollui dávviriid čájáhus. Máŋga sámi serve dán bargui, ja sámit leat leamaš sakka beroštuvvan museaásahusa ceggemis Kárášjogas. Priváhta olbmot leat geigen máŋga kulturhistorjjálaš dávvira SVD:ii, skeaŋkan dahje veháš máksámuša vuostá. SVD mihtilmas museaviessu rahppui 1972:s. Ovdal go museaviessu ceggejuvvui, bulii Sámiid álbmotallaskuvlla dávviriid vuorká. Dávviriid gádjo, muhto váldobeavdegirjjit dušše.
SVD Museasearvi lea vuođđudan SVD ásahusa, ja lea danin álggahan ja čuvvon ásahusa jođiheami álggu rájes. Dál eaiggátstivra fuolaha SVD beroštumiid, masa SVD musea- ja historjásearvvi jahkečoahkkin vállje miellahtuid. 2011-2014 eaiggátstivra: Jođiheaddji Thoralf Henrikse, lahtut: Svein Arne Bjørsland ja Olaug Larsson. SVD Musea- ja historjásearvi lei mielde vuođđudeamen BEASI Doaibmadálu Kárášjogas 2006 ja lea 2008:s searvan dása: Norgga Landslaget for lokalhistorie. SVD Museasearvi rievdadii namas 2011 jahkečoahkkimis SVD Musea- ja historjásearvái.
Doaibma
- Kárášjoga báikkálaš historjjá ja kulturárbbi lágideamit, seminárat ja kurssat
- Dokumentašunbargu lea álggahuvvon Kárášjoga jahkegirjin 2009, 2010, 2011. Jahkegirji 2012 ilbmá skábmamánus 2012.
- Oččodat joatkašuvvot Kárášjoga historjágirjebarggu ja Kárášjoga sohkagirjji ođasmahttima
- Lágidat báikkálaččat Kulturmuitobeaivvi, Kárášjoga gieldda ruhtadeapmi veahkkin
- Oalgálagaid SVD eaiggátstivrrain ovddidit SVD beroštumiid
Stivralahtut 2012
Jođiheaddji Gudrun E E Lindi, nubbinjođiheaddji Arne Nystad, stivralahtut Anny Vigdis Sara, Anne Kirsten Østby ja Johan Bakken Sandvik. Várrelahtut: Anne Marie Svineng, Piera Mosebakken, Stig Arne Somby. Čujuhus: c/o Gudrun E E Lindi, P.b. 67, 9735 Kárášjohka, tel. (+47) 78 46 73 32 / 959 35 626 E-poasta: jahkegirje@gmail.com Neahttasiidu: www.beassi.org
Ulbmil
Museasearvvi ulbmilin lea gáhttet sámi identitehta, giela ja kulturárbbi, ee. doarjjodettiin Sámiid Vuorká-Dávviriid vuođđudusa museabarggu.
Lahttovuohta
Ovttaskas olmmoš dahje lihttu gii dáhtošii ovddidit searvvi ulbmila, sáhttá searvat lahttun. Miellahttovuohta máksá 150 ru jahkái. Mávsse báŋkokontoi: 7593 05 03371.
Jahkegirjjit 2009-2012:
Don sáhtat oastit jahkegirjjiid 2009 ja 2010 50 ru/gpl, jahkegirjji 2011 100 ruvdnui ja jahkegirjji 2012 150 ruvdnui. Mávsse báŋkokontoi: 7593 05 03371. Merkes guđe nummiriid siđat. Sádde epoastta: jahkegirje@gmail.com
Gáldu:
- Julius-Iŋggá Gudrun Eliissá/Lindi, Gudrun E E: 70-jahkásaš ealáskan. Kárášjoga jahkegirji/Karasjok årbok 2009, s. 4-7.
- Lindi, Gudrun E E: Museumsforeninga i Karasjok 70 år – Samiske kulturminner i fokus, Lokalhistorisk Magasin 4-2009, s. 26-28
- Teigmo, Mari: Sámiid Vuorká-Dávvirat – De Samiske Samlinger som samisk kulturinstitusjon (1976)