Stemshaug kyrkje
Stemshaug kyrkje ligg i Aure kommune på Nordmøre. Kyrkja vart bygd i 1908, og er ein basilika i reisverk med 300 sitjeplassar. Vestfasaden er kledd med blikkplater. Kyrkja vart pussa opp innvendig i 1958. På same tid fekk bygget utsmykkingar ved kunstmålar og organist Olav Halse.
Interiør
Døypefonten og preikestolen er frå 1908. Orgelet er frå 1966.
Altartavla vart laga av Daniel Skipnes i 1914. Hovudmotivet er eit måleri av Jesus; det er henta inspirasjon frå Matt. 11:28: "Kom til mig, alle I som strever og har tungt å bære, og jeg vil gi eder hvile!" Noko som er spesielt for denne altartavla, er at ho er dekorert med utskjæringar av kong Olav den heilage, reformatoren Martin Luther og forkynnaren Hans Nielsen Hauge.
Kyrkjegarden
På ei høgd på kyrkjegarden finn vi ein minnestein over dei to personane frå gamle Stemshaug kommune som fall under andre verdskrigen. Steinen vart reist i samband med frigjeringsjubileet i 1995.
Det er gravlagt to sovjetiske soldatar på kyrkjegarden, desse omkom under andre verdskrigen. Lika av dei vart funne i fjøresteinane i november 1942, og kroppane vart gravlagte på kyrkjegarden etter å ha vorte undersøkt. Rundt 1994 vart det også reist eit minnesmerke på grava.
Andre opplysningar
På 1950-talet hadde Matias Orheim konsert i kyrkja, der han spela på glas.
Etter folketradisjonen skal Hans N. Hauge ha vore på Stemshaug ein gong, og bl.a. bygd ei mølle her. Men det finst ikkje belegg i historiske kjelder for dette. Derimot veit vi at ein haugianar-familie frå Orkdalen busette seg her.
Kjelder og linkar
- Kiplesund, Kenneth: Stemshaug kyrkje
- Kiplesund, Kenneth: Sovjetisk krigsgrav på Stemshaug
- Orten, Per Eilert: Den nye dagen gryr, 2000