Svein Helgheim

Svein Helgheim var ordførar i Sykkylven frå 1987 til 1999. Perioden 1991 - 1995 delte han ordførarvervet med Arnold Weiberg-Aurdal som sat som ordførar i åra 1991 og 1992.

Svein Helgheim var fødd i Jølster i Sunnfjord i 1934. Etter at han var ferdig med militærtenesta gjekk han handelsskule på Stranda. Deretter bar det til Volda og fireårig lærarutdanning ved Volda lærarhøgskule. Då han var ferdig med lærarutdanning, i 1962, fekk han arbeid som lærar i heimbygda, Jølster. Etter eitt år i Jølster fekk han lærarstilling ved Tandstad skule i Straumgjerde i Sykkylven. Her var han i tre år før han supplerte utdanninga si med to grunnfag ved lærahøgskulen i Trondheim, historie og pedagogikk. Då kunne han kalle seg adjunkt.Den nye Vik skule i Sykkylven stod ferdig i 1968, og Svein Helgheim vart då rektor her.

Helgheim engasjerte seg mykje i Friundervisninga i Sykkylven, og var leiar i Friundervisninga då den vidaregående skulen i Sykkylven vart skipa, dels ved hjelp av kurs i regi av friundervisninga.

Som politikar representerte han Høgre. Han kom første gongen inn i kommunestyret i 1980, og sat der fram til 1999. Frå 1984 hadde han plass i formannskapet. Som ordførar la Helgheim vekt på å få til samarbeid om konkrete løsyingar til beste for kommunen. Om dette sa han i eit intervju med Sykkylvsbladet i 1994: "Eg har den innstillinga til arbeidet i kommunestyret at eg vil prøve å leggje til rette for løysingar som eit fleirtal kan stå bak. Andre meiner nok at eg skulle vere meir markant og få fram dei skiljelinjene som ligg der ein stad.

Helgheim heldt fram med samfunnsinnsats også etter at han gjekk ut av kommunestyret. Mellom anna var han ei årrekkje styreleiar i Aure omsorgsbustader.

Kjelder:

• Jon Hole/Mindor Hjellegjerde: Sykkylven kommune - Sykkylven kyrkje 1883 - 1983. Sykkylven 1983.
• Eldar Høidal: Sykkylven vidaregåande skule 25 år 1974 - 1999. Sykkylven 1999.