Thomas Hermansen: Forskjell mellom sideversjoner

Thomas Hermandsen vart fødd 8. januar 1853 på Tysnes, som son av handelsmannen Herman Olai Hermandsen. Sju år gammal vart han sendt til besteforeldra i Bergen, tollrorskar Thomas Lie og hustru Anne Karine. Dei var ikkje hans ordentlege besteforeldre, men var av faren sin morbror-familie – Thomas Lie var ein fetter av Herman Olai. Det hadde sjølvsagt i første rekkje med skulen å gjera - Thomas skulle ha ei ordentleg utdanning. Og det fekk han også - fram til 1871 var han elev ved katedralskulen. Etter studenteksamen gjekk turen til Kristiania. Her fullførte han sin juridiske embetseksamen i 1876 – no heiter han Brown Lie Hermandsen. Som nyutdanna jurist kom han til Hardanger og Voss som sorenskrivarfullmektig. Etter to år her bar det attende til Kristiania, til ei stilling i Finansdepartementet. Men etter mange år i hovudstaden hadde han teke til å lengta vestover. Om han ikkje hadde visst det før, så oppdaga han det no - heimlengten plaga han. I 1885 slo han seg ned på Kronstad i Årstad. Der vart han buande livet ut.

Cand. jur. Thomas Hermandsen vart i 1884 utnemnd som den første stiftsarkivaren i Bergen (noverande Statsarkivet). Han var då ikkje meir enn 31 år gammal, den yngste som nokon gong har hatt dette embetet. Samanlikna med aktiviteten ved arkivet i dag var dei første åra ved stiftsarkivet ganske så  rolege. Den første førespurnaden kom 27. april 1886, og vart  besvart på side 1 i kopiboken 25. mai, fortel statsarkivar Yngve Nedrebø i  ein artikkel om stiftsarkivar Thomas Brown Lie Hermandsen i Statsarkivet sitt magasin "Bergensposten". Den første lesesalsgjesten kom i juni, og dagboka fortel om 23 gjestar første året. Men etter kvart auka gjestetalet, og i 1902 var det 662 registreringar i dagboka.