Vant

Eit vant er eit taug eller ein vaier som går frå høgt oppe på mastra ned til båtsida og som hjelper mastra til å stå stabilt i forhold til tverrskips påverknad. Ved å vera festa noko attom mastra balanserer dei òg mot staget som går frå mastra til framstamnen, og dei bidreg dermed òg til å stabilisere mastra langskips. På vestlandsbåtar, nordvestlandsbåtar, åfjordsbåtar og nordlandsbåtar er vanta gjerne festa til båtsida med seglnåler — avlange trestykke som blir hekta under løkker på båtsida og klipne saman med ein ring nærme toppen av nåla. Dermed er det lett å løyse ut vantet i ein hast når det trengst. På nokre båttypar er det eit det eit odde tal vant. Da blir det sett eitt eller to vant på kvar side, og det siste vantet blir sett på høgbord (losida av båten), slik at det er fleire vant i høgbord enn i lebord.

Dei fleste tradisjonelle båttypane med sprisegl på Aust- og Sørlandet har frå gammalt av ikkje vant, men berre eit stag frå mastra til framstamnen.