Lesja kompanis telthus

Telthuset på Maihaugen.

Foto: Arnfinn Kjelland (2016).

Lesja kompanis telthus står i dag på Maihaugen. Telthuset vart bygd ved Dovre kyrkje truleg i 1753 for Lesja kompani. I Maihaugen 2005 står det at huset er bygd 1789, noko som er tilbakevist av Langdalen 1992.

I eit oversyn over status for lagringsforhold i 1. eller Austre Opplandske regiment datert 28.10.1723 er det elles opplyst at kompaniet allereie hadde telthus.

Laftene i huset viser at det har vore flytt fleire gonger. Erik Langdalen har kartlagt kvar huset truleg har stått på grunnlag av primærkjelder. Da det vart bygd var det like ved søre korsarma på kyrkja. I 1759 vart det flytt til ei ny tomt, kanskje ikkje langt unna, eller litt lenger til Toftemoen, der det i alle fall stod i 1772 og vart ståande til det gjekk ut av militær bruk på 1800-talet. Brukar i 1878 var Dovre Handelsforening, med det var framleis Forsvarsdepartementet som var eigar. I samband med at han kjøpte huset i 1932 og flytta det til Maihaugen nemner Anders Sandvig at det hadde vore brukt som stabbur på Li.

I 1911 fekk det dåverande Dovre Ungdomslag løyve frå Stortinget til å overta telthuset viss dei flytta det frå Toftemoen til Dovre sentrum og bygde det opp att som 'ungdomshall'. Da kom det til «Telthustomta» ved Slåvik, på tomtsom skal vere utskilt frå Ekre. Sandvik prøvde alt i 1912 å få kjøpe huset til museet sitt, men det gjekk ungdomslaget mot. Engen 2011 skildrar ymse bruk av huset, planar, nye forsøk frå Sandvik og strid om eigedomsretten fram til det kom til Maihaugen.

Kjelder

• Engen, Arnfinn 2011: Striden om flyttinga av telthuset på Dovre til Maihaugen. I Dovrebygde side 87-90.
• Kjærland, Lars 1955: Kirkene som sentra for militærøvinger og som lagerlokaler for militært- og annet materiell i eldre tider. Norsk Militært Tidsskrift nr. 9, 1955, særtrykk.
• Langdalen, Erik 1992: Telthuset fra Dovre. I Dovrebygde side 10-14.
• Maihaugen. Nøkkelen til friluftsmuseet. 2005 side 23.