Vevatnet
Vevatnet er eit vatn ved grenda Lunde (Tysnes) nord på øya Tysnes i Sunnhordland. Etter Magnus Olsen og seinare forfattar og lokalhistorikar Johannes Heggland vert vatnet sett i samband med den romerske historieskrivaren Tacitus si skildring av dyrkinga av jord- eller grødegudinna Nerthus, som i så fall følgde med harudane som busette seg på Vestlandet og gav namn til Hordaland. Grunngjevinga for eit slikt synspunkt fann Heggland i tolkinga av stadnamnet «Ve» for heilag, og at det fanst i nærleiken av Lunde (heilag lund).
På Tysnes finst det også ein annan stad som heiter Ve (Tysnes). Også denne staden er sett i samband med heidensk gudedyrking. I Noreg finst det totalt seks stader med dette namnet (stadnamnet Ve eller ordlekken Ve-). Vevatnet er saman med andre liknande tolkingar av stadnamn som heilage ein viktig del av Tysnes sitt historiske sjølvbilete som "gudeøya", som nyleg også vart kommunen sitt offisielle slagord.