Anne Vindegg (1884–1980)

Anne utanfor stølen Prestholt oppunder Hallingskarvet. Biletet vart brukt i ei lærebok for ungdomsskulen på 1970-talet.

Foto: Paul Andreas Røstad, Norsk teknisk museum/DEXTRA, 1969.

Anne Tolleivsdotter Vindegg (fødd 14. juni 1884, død 25. oktober 1980) var gardkone på Vindegg i Kvisla, Hol.

Anne vart fødd på Tufto, ein av nabogardane til Vindegg. Her hadde mora, Mari Ellingsdotter (1847-1937), vakse opp. Faren, Tolleiv Knutson (1846-1931) var frå Verpe i Ustedalen ved Geilo. Paret overtok Tufto i 1871, same året som dei gifte seg.

Anne hadde seks eldre og to yngre syskjen: Ragnhild (1871-1918), Elling (1873-1963), Knut (1875-1963), Pål (1877-1893), Birgit (f. 1879), Olav (1882-1956), Asbjørn (1887-1973) og Ambjør (1889-1967). Birgit dro til Amerika, medan resten av syskjena vart buande i den vesle bygda Kvisla. Elling på Tufto, Knut på øvre Sand, Olav på søre Givsjord og Anne på Vindegg.

I 1911 gifte ho seg med Ole Olson Vindegg (1880-1955). Paret fekk sju born: Olav (1911-1994), Torleiv (1913-1986), Mikkel (1915-1988), Ingebjørg (1917-2004), Maria (1919-2003), Erling (1922-2006) og Sissel (1925-1988). På Ustaoset dreiv dei Osestølen. På stølseigedomen fekk Ole frå byrjinga av 1900-talet sett opp ei rekkje hytter, og hyttedrifta vart ei viktig attåtnæring til gardsdrifta, som etter kvart sysselsette heile familien.

Galleri

Anne gjekk i "døs" (holingsdialekt for stakk) kvar dag fram til ho døydde i 1980, og var truleg ei av dei siste som gjorde det i Hol.

Anne i bakken nedanfor Nystølhøvda på Ustaoset, på vegen mellom Nyestølen og Osestølen, som begge høyrde til Vindegg. Her har ho ikkje jutl (belte) i stakken. Kan hende fordi ho var gravid med Ingebjørg. Ukjend fotograf, 1917.
Anne og Ole med seks av ungane på trappa utanfor Osestølen. Her er familien pynta til fest. Anne med hette og truleg svart stakk. Ole har "hallingkleu" med sylvknappar. Kan biletet vera frå dåpsdagen til Sissel, som vart fødd i januar? Ukjend fotograf, 1925.
I kvardagsklær på vollen nedanfor Osestølen. Anne i stakk med jutl og skaut, Ole i busserull utan lokale særmerke. Biletet er tatt av hytteeigar Trygve Serck-Hanssen, 1939.
Her er Anne i full festbunad med hette, slør i halsen og sylvstas. Jentebunaden til barnebarnet har truleg gått i arv. Til den høyrer lue med raudt band og raude sokkar. Biletet er teke utanfor Vindegg, fjøset i bakgrunnen. Foto: Ingebjørg Vindegg, om lag 1967.