Håkon Evjenth
Håkon Evjenth (1894–1951) var ein forfattar og jurist frå Bodø som særlig er kjent for barnebøkene sine frå nordnorsk natur.
Håkon Evjenth blei fødd i Bodø den 26. desember 1894 som son av advokat og statsråd Håkon Martin Evjenth (1865–1934) og Martha Backer (1867–1906). Han voks opp i Bodø, blei cand.jur. i 1917, og budde nokre år i Oslo før han starta eigen sakførarpraksis i Vadsø i 1921. I 1925 flytta han tilbake til Bodø.
Han debuterte som forfattar i 1927 med boka Finnmarksjakter. Gjennombrotet kom med ungdomsromanen 3 på to og 2 på fire i 1935. Dei fleste bøkene hans er komne ut i fleire utgåver. Handlinga er som regel lagt til nordnorsk villmark, og det økologiske perspektivet er gjerne framtredande, saman med ei tydelig, underliggjande opplæring i friluftsliv, nordnorsk geografi og samisk kultur. Evjenth var i det heile tatt ein føregangsmann for naturvern og friluftsliv.
Evjenth hadde stipend frå Institutt for sammenlignende kulturforskning 1927–1930 og budde 4 år i sjølvbygd gamme i Suonjo på Varangerhalvøya. Evjenth deltok i motstandsarbeidet under andre verdskrigen, og han satt fanga først i Bodø og Trondheim, og deretter på Falstad og Grini 1943–45. Boka hans Krig i kvitt blir rekna som den første romanen om krigen i Nord-Noreg.
Håkon Evjenth døydde den 10. juni 1951.
Bibliografi
Skjønnlitteratur
- 1928 – Folk under fot (roman)
- 1935 – 3 på to og 2 på fire (ungdomsbok)
- 1936 – På to og fire i Suonjo (ungdomsbok)
- 1937 – Over Kjølen i kano (ungdomsbok)
- 1939 – En fiskergutt i sameland (ungdomsbok)
- 1940 – På langferd i grenseland (ungdomsbok)
- 1941 – Falkefengeren (ungdomsbok)
- 1945 – Krig i kvitt (ungdomsbok)
- 1947 – På falskt pass (ungdomsbok)
- 1948 – Hytta i fjellet (ungdomsbok)
Faglitteratur
- 1927 – Finnmarksjakter
- 1938 – Gutten som Norge glemte : Johan Koren
- 1945 – Han som reddet verden : Winston Churchill
- 1946 – Trollbotn (erindringsbok om livet på eiga hytte)
Kjelder
- Vold, Karin Beate: «Håkon Evjenth», i Norsk biografisk leksikon, bd 3. 2. utg. 2001.