Landnotset i Austefjordområdet

Alle som skulle setje landnot måtte kunne notaseta eller notakasta elles så vart det unødig mykje reparasjonar av nøtene. Stein, trerøter og anna rusk på botnen vart kalla «hengje». Notakarane visste om hengja var lette eller vanskelege å hanskast med.

Desse notaseta er kjende i Austefjordområdet og brukte av notlaga her:

• Holsvika: 62.05937° N 6.31266° Ø Har rein botn med unntak av ein stor stein som ligg litt utfor renna frå Storenotanaustet og ei helle ved elva. (Steinen har sikkert eit namn).
• Utom Holmen: 62.05917° N 6.30925° Ø Rein botn frå notahengjet litt utom Haggaren i Holsvik-stranda, litt etter kor djup nota var.
• Djuvikstranda: 62.05913° N 6.30412° Ø Frå Haggaren ei urd, så eit lite område med «kast», så ei urd att.
• Djuvika: 62.06° N 6.30168° Ø «Kast» innom «Laurits-naustet», så urd, så «kast» frå litt innom Djuvikelva nesten til inste Stigalidet.
• Skinvika: 62.06304° N 6.29841° Ø Lite kast (vest for kai frå 1965) mellom kaiene til Skinviksandtaket. Så dårleg til utom Skinvikelva (Follabugen).
• Follabugen: 62.06476° N 6.2943° Ø «Kast» frå Skinvikelva til elva frå Follavatnet. Men ein «hund» eit stykke bort for Skinviknaustet, nokre steinar for Åkoma i Botnahola, noko problem rundt Kuen. Vidare mot Kieneset vanskeleg å kaste, dels grunna vanskeleg botn men mest grunna sterk straum.
• Granden / Grasneset / tidl. Grusneset: 62.06297° N 6.31646° Ø Er blaut sand å styre seg i ved fjøre sjø. Ved flod sjø blir det vanskeleg då ein får elvestraumen i nota. Er brådjupt og derfor vanskeleg å få nota i botn fort nok til å berge fisk.
• Gjerdestøda: Knapt kast for støda.
• Trosvikja: Knapt kast frå gamalt.
• Engjabugen: Rimeleg rein frå steinrøys til Engjatunet. Ein stor stein noko av land på indre del. 2009 utgått som landnotkast grunna vegarbeid på Kvivsvegsambandet / Fyrdsbergtunnelen.
• Flatefjøra: Brukande.
• Leirvikskjæret (Hamre): Knapt, men godt kast.
• Leirvikja (Aurstad): Paddemark.
• Dalen: Brukande.
• Skorneset: Kast på innsida mot Hamrefluda.
• Trongestyda: God.
• Andaskæret: God. Straumhart.
• Sagstyda: Alminneleg bra.
• Utsida Kalafluda: Kast
• Innsida Kalafluda: Kast.
• Kastet på sydsida av Matskjæret: Knapt. Ikkje brukbart lenger.
• Benken: Brukbart, nærdjupt.
• Djupebugen: Knapt kast.
• Selvikstøylane: Knapt / brukbart.
• Kråkehaugen: Knapt.
• Saudevikja (før Hjorthaug): Knapt.
• Hjartåbugen: «Elin» ligg på botnen her, vanskeleg.

Kjelder og informantar:

• Aarset, Hans f.1936
• Høydalsvik, Oddvar E. f. 1951