Bø kommune (Telemark)
| Bø kommune | |
|---|---|
| |
| Basisdata | |
| Kommunenummer | 0821 |
| Fylke | Telemark |
| Kommunesenter | Bø |
| Grunnlagt | 1838 |
| Opphørte | 2020 |
| No del av | Midt-Telemark kommune |
Bø kommune var fram til 1. januar 2020 ein kommune i Telemark med namn etter bygda. Fram til slutten av 1800-talet låg bygdesenteret på Oterholt, nord for det noverande sentrum. Frå 1890-talet voks «Bøbyen» fram som nytt administrativt og kommersielt sentrum og blei seinare administrasjonssenter i kommunen.
Eit viktig vendepunkt i utviklinga av Bø kom då Sørlandsbanen blei ført gjennom bygda. Bø stasjon opna i 1924, og blei eit knutepunkt. Frå stasjonen gjekk fleire bussruter, mellom anna til Vest-Telemark.
Bø har alltid vore ein landbrukskommune, men i nyare tid blei også handel og tenesteyting viktige næringar. Høgskolen i Telemark, med kring 1 600 studentar, prega lokalsamfunnet sterkt.
Bø kommune var ein del av regionen Midt-Telemark, som også omfatta Nome og Sauherad. Dei tre kommunane var med i Midt-Telemarkrådet.
Kommunevåpenet hadde tre feler i gull på raud botn og viste til den sterke folkemusikktradisjonen i bygda.
I samband med kommunereforma 2014–2018 inngjekk Bø kommune ein intensjonsavtale med Sauherad om samanslåing. Samanslåinga blei vedteken av Bø kommunestyre 16. juni 2016. Den nye kommunen tok til å gjelde 1. januar 2020, og Bø blei ført vidare som administrasjonsstad. Namnet Midt-Telemark kommune blei fastsett etter ein namnekonkurranse der innbyggjarane deltok. Ved samanslåinga hadde den nye kommunen om lag 10 000 innbyggjarar og var den 113. største kommunen i landet målt i folketal.
Mot slutten av 1800-talet høyrde Bø til Nedre Telemarkens fogderi i Bratsberg amt.
Bø grensa mot Notodden i nord, Sauherad i aust, Nome i sør, og Kviteseid og Seljord i vest.