Hotellvegen (Hjartdal)
Hotellvegen i Tuddal i Hjartdal kommune går nordvestover frå Gaustavegen ved vatnet Nøtting til Tuddal Høyfjellshotell der han òg møter Zakkæusvegen. Han er om lag 1,1 kilometer lang.
Vegen har namn etter Tuddal Høyfjellshotell og vart namnsett i 2011.
Tuddals Høifjeldssanatorium vart sett opp for høgsterettsadvokat Emil Oluf Roll (1864–1934) og kompanjong Peder Lexov, sokneprest i Hjartdal. Det skulle ikkje vere eit sanatorium for dei sjuke, men eit for rekreasjon og kvile for finare folk frå Kristiania. Den første hytta sto ferdig i 1893, og allereie i 1895 sette dei opp den store treetasjes hovudbygningen i dragestil etter teikningar av arkitekt Hjalmar Welhaven.
Etter fleire konkursar vart sanatoriet i 1910 gjort om til hotell, men det gjekk ikkje betre enn at det hamna på tvangsauksjon i 1935. Hotellet vart kjøpt av investorar frå Oslo, mellom anna Zakæus Gurholt og Magnhild Simonsen, og det vart danna eit aksjeselskap. Fru Simonsen dreiv staden fram til 1940, da Zakæus Gurholt kjøpte ut henne og dei andre aksjonærane. Gurholt og kona, Gudrun, flytte til Tuddal og dreiv hotellet på heilårsbasis i 31 år før dei gav seg. I dag er det fjerde generasjon Gurholt som driv hotellet.
Kilder
- Kartverket: Norgeskart
- Hjartdal kommune: Vegoversikt pr 31 05 2011.pdf
- Telemarkshistorier: Tuddal Høyfjellshotel - tradisjon i 127 år
- Nes, Trygve: Hjartdal i bilder. Skien 1992