Lauvstad, nedre (Fyresdal)

Lauvstad, nedre (Fyresdal gnr. 37/5/2) er ein eigedom i Folkestadbyen i Fyresdal kommune med adresse Folkestadgata 20 og frådela Århus (Fyresdal gnr. 37/1).

I 1886 fekk Kjetil Tarjeison Vik leigekontrakt på ei tomt Lauvstad til 7 kroner årleg leige. To år seinare fekk han på ny ei tomt Lauvstad øvre, til 7 kroner årleg leige. Der sette han opp nye hus, og selde i 1890 dei gamle husa på Lauvstad nedre til Jon Kjetilson Kiland for 1000 kroner. Stova kom frå Nordbø ved Nesland (Fyresdal gnr. 37/1). Frå han gjekk husa og bygselen vidare til Dreng Larsson Lie same året. Han var snikkar og gift med Torbjørg Olavsdtr.

I 1900 var det Knut Olavson Vaddeli og kona som budde her. Knut var då styrar av Moland Forbruksforening, bankkasserar og kommunekasserar. Smeden Lars Bjørguvson budde òg her med kona si.

Frå ikring 1905 hadde Såvi Gunnarson N. Bondal (1872-) fått hand om Lauvstad. Han gifte seg i 1904 med Tone Sigurdsdtr. Moghus og kjøpte seg då inn her som landhandlar. Etter at sonen Gunnar overtok vart den gamle butikken i 1950 åra rive og nytt bygg satt opp nord for det gamle. Bygget er rausta parallelt med Folkestadgata og der var butikk i fyrste høgda og bustad i andre. Etter ein del år vart huset bygd om og der er i 2020 private bustader i båe høgder

Tomta vart utvida ved leige/feste av Svippehagen (Fyresdal gnr. 36/1/5) i 1916 i 99 år for 80 kroner årleg leige. Dette var nord for husa, her dyrka Såvi opp ein stor hage. På denne parsellen er i 2020 eit nytt kontorbygg, Lauvstad (Fyresdal gnr. 36/88/4).

Det nye store forretningsbygget (Fyresdal gnr. 37/44) ligg lenger nord på tomt frå Århus.

Biletgalleri

Bondalsbua (Nedre Lauvstad) til venstre og Bygdheim til høgre. Nærast fotografen, altså på denne sida av vegen, held gråsteinsmurarar på å lage til ein grunnmur som kan vere den til Fredheim. Årstal ukjent, men fotograf Olav S. Nylid
Vi ser Lauvstad nedre, "Bondalsbua", lengst bak. Handelslaget til høgre. Foto: Wergelands Kunstforlag
Folkestadgata mot nord. Lauvstad er den store bygningen bak furua på biletet
Folkestadgata med "Bondalsbua" rett fram, Sommerro til høgre og gamle Austad til venstre. Dette er truleg ved "Telemarkens kreds av kristelige foreninger for unge" sitt årsmøte i Fyresdal 1906. Foto: Olav S. Nylid
Folkestadgata mot syd. Lauvstad er bygningen til venstre, ofte og kalla "Bondalsbua".Telemark Fylkes (Bygde)ungdomslagsstevne 1927 Foto: Olav S. Nylid
Nedre Lauvstad. Nybygd i 1950 åra som kombinert forretningsbygg og bustad, seinare ombygd til reint bustadhus. Foto Tore Samuelsen 2019