Telset og Torvik notlag – Notbruk i Dalsfjorden (Volda)

Telset og Torvik notlag vart etablert i 1953, då det vart kjøpt landnot frå Syvdsbotn. Det var ei storenot på ca. 90 famner og djupte på 12 famner. Operasjonsområdet deira var Dalsfjorden, Austefjorden, Ørstafjorden, Haddalvika, Leikongvika og inne i Vanylven. Parthavarane i nota var: Peder Stokke (notbas f. 1908), Jakob Telseth (f. 1911), Oddvar Telseth (f. 1939) og John Thorvik (f. 1938).

Laget hadde også ein notbåt (gavlbåt) men denne var utan motor. Som spelbåt brukte dei ein båt som Jakob hadde på Telset. I båten rigga broren Olav til sjølvkonstruert spel, som visstnok fungerte ypperleg. Olav var smed og mekanikar og visste korleis slikt utstyr skulle lagast. Som slepebåt vart MB «Laxen» nytta den første tida. Det var båten som Jakob eigde.

Nota var ei bomullsnot med brislingband. Stengjenot og orkastenot vart kjøpt på Rovde på Rot/Midtbø (Rotabygda). Dei skaffa seg også nokre notposar, som var av nylon. Nothenge vart bygt i Torvik, og notbåten hadde også plass i naust i Torvik.

Prøvekastet gjekk føre seg på Sundnesbugen på Rovde, og etter det John fortel - med eit glis - fekk dei også nokre få sildar og eit par laksar. I 1956 gjorde dei det største kastet sitt i Ørstafjorden ved Oselandet. Dette var rein brisling, og fangsten vart henta med direktebåt til Stavanger. Båten heitte endåtil «Christian Bjelland».

Etter at alle utgifter til båt og driftsutgifter var betalte, fekk kvar parteigar utbetalt kr 3700, som var mykje pengar den gongen, kanskje langt på veg ei årsløn. Fangstinga var unnagjort på ca. 17 timar.

Det vart no kjøpt «ny slepebåt», MB «Nup» (reg.nr. M 38 D, seinare M 137 VA).

Notdrifta vart avvikla rundt 1960, då det etter kvart vart mindre å tene på dette fisket. Etter det John fortel vart notbruket selt til Gursken ein stad

Kjelder og informantar

• Kvangarsnes, Hallstein f. 193?: Ingeniør og mangeårig leiar i mekanisk industri – har samla og skrive artikkelen Notbruk i Dalsfjord - i Minne frå Dalsfjord, Dalsfjord Sogelag 2011
• Minne frå Dalsfjord, Dalsfjord Sogelag 2011
• 1965: DALSFJORD – Bygda - Gard og ætt https://www.nb.no/items/47e3686f63a708195385a7c7dfc75cbc?page=0
• Lyngnes, Sverre: Dalsfjord. Bygda. Gard og ætt. Utg. Dalsfjord sogenemnd. 1965. Digital versjon på Nettbiblioteket.
• Cronologier av Ole Reite
• Fiskebåtregisteret ved Austefjord Museum
• Busetnadssoga for Volda bd 1 + nokre tun bd 2
• Austefjord museumslag
• Herøy kystmuseum
• Høydal notlag

Lokale informantar for Notbruk i Dalsfjord

• Jakob Koppen
• Olav H. Velsvik
• Robert Welsvik
• John Thorvik
• Jon J. Kornberg
• Sverre Kvangarsnes
• Ivar A. Sætre
• Andè Sætre
• Solfrid Nautvik
• Asbjørn Åsebø
• Ola S. Løvik
• Lauritz S. Løvik
• Lars K. Løvik
• Ola K. Hjelle
• Arvid Rossetvik
• Annfred Lillenes
• Einar Furnes
• Bjarne Myklebust
• Olav Dalebø
• Jarle Dalebø
• Harald Mårstøl
• Jostein Mårstøl
• Norvald Mårstøl
• Åsta Mårstøl
• Arvid Eidså
• Rolf Eidheim,
• Arne Eidset
• Harald Eidset
• Jon M Steinsvik
• Hans J. Steinsvik
• Svein Øverberg
• Bjarne Drivdal
• Nils Jakob Drivdal