Sara Thompson Richey
Sara Thompson Richey (født 6. mars 1818, død 29, juli 1905) var ein av dei yngste utvandrarane med sluppen «Restauration» i 1825.
Liv
Ho var dotter av Bertha Carine Ådnesdotter (1790-1844) og Ånen Toresen Brastad (1795-1826). Faren var frå Konsmo i Agder, mens mora var frå Klepp på Jæren, der dei budde i 1825 og der Sara må ha vorti født. Dei kom over Atlanterhavet da Sara var sju år gamal, og busette seg i Rochester. Foreldra kalla seg Bertha Caroline og Oyen Thompson etter at dei kom til Statane.[1] Eit snautt år etter døydde far hennar, og mor hennar gifte seg på ny i 1827 med Nels Thompson (Nils Toresen Brastad), bror til faren. Året etter flytta dei til Kendall, der dei fleste av sluppefolket budde.
I 1834 flytta dei vestover til LaSalle County i Illinois, og her vart Sara buande mykje av livet, fyrst i Ottawa, seinare i Marseilles. 20. mars 1837, nitten år gamal, gifta ho seg med George Olmstead, og dei budde saman i Ottawa fram til han døydde i 1849. Hu vart buande i Ottawa fram til 1855, da ho gifta seg med William W. Richey, enkemann etter systera Anna Maria (1819-1842). Dei flytta til Marseilles, der dei vart verande i atten år, og seinare flytta dei til ein gard i Brookfield, lenger sør, der dei budde i ni år.
Da Rasmus B. Anderson gav ut bok om dei fyrste norske innvandrarane i 1896, hadde Sara T. Richey vori fråskilt i ni år, og budde aleine i Guthrie Center, Iowa. Det er ikkje kjent kva år ho døydde.
Sara T. Richey fekk fem born med fyrste ektemann sin, og tre med andre. Fire av dei var i live i 1896:[2]
- Benson C. Olmstead, gardbrukar i Guthrie County, Iowa.
- Charles B. Olmstead, gardbrukar i Guthrie County, Iowa.
- Cora A. Richey, gift Morris, busett i Nebraska.
- Will F. Richey, gardbrukar i Guthrie County, Iowa.
Fotnoter
Litteratur
- Andersen, Hans G.: Emigrasjonsskipet Restauration. Utg. H.G. Andersen. 2005. 128 s. Digital versjon på Nettbiblioteket.
- Anderson, Rasmus B.: The first chapter of Norwegian immigration (1821-1840) : with an introduction on the services rendered by the Scandinavians to the world and to America. Utg. R.B. Anderson, Madison, Wisconsin, 1896. Digital versjon på Nettbiblioteket.
- Sara Thompson Richey i Historisk befolkningsregister.
- Gravstøtte