A. Asbjørnsen Lenestolfabrikk

A. Asbjørnsen Lenestolfabrikk var ein møbelprodusent som heldt til i Knutgarden på Aure i Sykkylven. Bedrifta vart starta av Asbjørn Asbjørnsen i 1944. Asbjørnsen kom til Sykkylven frå Øverdalen i Romsdalen, i grenseområdet mot Oppland, i 1934. Han var skreddarutdanna, og dei første åra han var i Sykkylven, arbeidde han i konfeksjonsverkstaden til Paul Furseth. Då krigen kom, vart det vanskeleg å halde oppe produksjonen, og Asbjørnsen dreiv i ei tid med skogs- og byggjearbeid. Eit stykke ut i krigsåra kom han i gang med møbelproduksjon. Møbelverksemda var eit framhald av ein korgvarefabrikk som Petter Con. Hjorthol og Petter O. Straumsheim hadde skipa i Straumgjerde i 1933. Petter Hjorthol og Asbjørn Asbjørnsen dreiv i lag i vel eitt år før Asbjørnsen tok over utstyret og byrja for seg sjølv i 1944.

Han fekk lokale i husværet til svigerforeldra i Knutgarden. Asbjørnsen spesialiserte seg på overstoppa lenestolar og salongar. Treverket tok han frå snikkarbedrifter andre stader i kommunen.

I 1949 byrja han å byggje hus på ein parsell av Knutgarden. Då han hadde fått opp grunnmurane og støypt plate over, kunne han flytte verksemda dit. Fabrikken disponerte då eit produksjonsareal på 130 kvadratmeter. Arbeidsstokken vart etter flyttinga utvida til seks personar medrekna eigaren.

Varene vart selde over heile landet, men mest gjekk til møbelhandlarar på Austlandet og Sørlandet. På Austlandet hadde verksemda i mange år eit godt samarbeid med agentforretninga Jens Mostad & Co.

Bedrifta vart avvikla i ordna former i 1960.

Kjelde

• Høidal, Eldar: Industrisoge for Sykkylven. Sykkylven 1990. Digital versjon på Nettbiblioteket
• Intervju med Asbjørn Asbjørnsen, 1999. Norsk Møbelfaglig Senters arkiv, Sykkylven.