Jon Torsteinsson Veflen
Jon Torsteinsson Veflen (fødd 15. september 1837 i Vang i Valdres, død 25. mars 1934 same stad) var bonde på Nørre Vøvle (Veflen), Høre sokn i Vang.
Han vaks opp på Nedre Kjøs (gnr. 94/1, seinare kalla Lalim) i Vang, som son av Torstein Ivarsson frå Hemsing og Sigrid Jonsdotter f. Remme. Foreldra hadde kjøpt garden i 1831. Eldstebroren Ivar (1834-1925) tok over Kjøs, men Jon gifta seg i 1862 med dottera på Nørre Vøvle, Berit (1840-1931). Ho var dotter av Erlend (Elling) Olsson og Anne Andrisdotter Bunde (1814-1900). Jon og svogeren Ola dreiv fyrst Vøvle i lag, men i 1867 reiste Ola og familien til Amerika. Jon vart då eigar og brukar av heile garden.
Jon og Berit Vøvle fekk desse sju borna:
- Torstein (1862-1884). Han bada og drukna i elva ved garden.
- Anne (1864-?), gift med Svein Rengistad på Røvang i Vestre Slidre.
- Sigrid (1866-1940), ugift, budde på Vøvle.
- Berit (1869-1937), jordmor, gift med Hans H. Rogstad i Gjerdrum.
- Kjersti (1874-?), til Amerika, ugift.
- Andris (1878-1952), overtok garden.
- Ola (1881-?), til Amerika, gifta seg der.
Sonen Andris vart gift med Ragndi Kristoffersdotter Kvål, og dei overtok både Vøvle òg farsgarden hennar, der dei heldt til storparten av tida. Folketeljinga i 1910 syner at Jon og Berit Vøvle budde som livaursfolk på Vøvle, saman med dottera Sigrid «som styrer huset for sine forældre». Til hushaldet høyrde òg Sigrid si dotter, Inga.
Både Berit og Jon vart riktig gamle; høvesvis 91 og 96 år.
Kjelder og litteratur
- John Torstensen i folketelling 1865 for Vang prestegjeld fra Digitalarkivet.
- John Torsteinsen i folketelling 1910 for Vang herred fra Digitalarkivet.
- Jon Torsteinsson Veflen i Historisk befolkningsregister.
- Frøholm, Anders: Valdres Bygdebok I Del C : Gardar og slekter i Vang. Høre sokn, Valdres Bygdeboks forlag 1991. Digital versjon på Nettbiblioteket, s. 92 og 212-213.