Vangsnes
Vangsnes er ei bygd, eit kyrkjesokn og ein ferjestad i Vik kommune. Garden Vangsnes har truleg namnet etter Vangsen 'plogskjeret', eit skjer i sjøen utanfor Vangsnes. Staden er mest kjend for den store Fridtjof-statuen av Fridtjof den frøkne, som keisar Wilhelm II av Tyskland fekk sett opp i 1913.
Då formannskapsdistrikta vart oppretta i 1837, høyrde Vangsnes sokn til Leikanger. I 1850 vart Balestrand oppretta ved at Leikanger vart deld og Vangsnes vart då del av den nyoppretta Balestrand kommune. Det neste, og til no siste, kommuneskiftet kom i 1964 då Vangsnes vart overførd til Vik.
Vangsnes sokn er eit kyrkjesokn i Indre Sogn prosti. Soknet har ei kyrkje, Vangsnes kyrkje frå 1861. Den noverande kyrkja erstatta ei stavkyrkje frå 1100-talet.
Frå Vangsnes er det ferjesamband over til Hella og Dragsvik på nordsida av Sognefjorden.
Kjelder
- «Fridtjof den frøkne på Vangsnes» i Sogn og Fjordane fylkesleksikon fra NRK
- «Vangsnes», Wikipedia
- Eldre fotografi frå Vangsnes på nettstaden til Nasjonalbiblioteket
- Dag Juvkvam: Historisk oversikt over endringer i kommune- og fylkesinndelingen. Statistisk sentralbyrå s. 53/54 (6. juli 2005)
Vangsnes er ein del av kulturminneløypa Kulturminne langs Sognefjorden