Christi Brandser
Christi Brandser (fødd 1861 i Skjåk, død 1931 i Heidal i nåverande Sel kommune) var lærar og gardbrukar. Førenamnet er stundom skrive Christie, Kristie og somme stader truleg mistydd som Kristen.
Han var fødd og oppvaksen på garden Nørdre Brandsar i Skjåk. Foreldra var gardbrukarparet Hans Kristen Hansen på Brandsar(1830-1865) og Margrete Erlandsdotter frå Kvåle (1827-1907). Christi hadde tre brør. Den eine, Erland (f. 1855) vart i likskap med Christi lærar. Erik (f. 1865) var underoffiser og seinare gardbrukar etter foreldra. Eldste broren, Hans (f. 1852) er i folketeljinga 1875[1] registrert som «sygevogter» ved garnisonssjukehuset i Kristiania.
Christi gifta seg 8. januar 1897 med Gonetta Marie Olsdotter Faukstad, f. 1863 på Landgård i Øyer.[2]
Gjennomgådde kjelder viser ikkje kvar Christi hadde lærarutdanninga si frå, og opplysningane om hans lærarkarriere er også noko mangelfulle. Han var lærar på eit framhaldsskulekurs på Søre Hyrve i Skjåk i 1893, og fekk det året skipa det fyrste frilynde ungdomslaget i Skjåk, U.L. Bergtorskvål.[3] I tidsrommet 1898-1911 (?) var han folkeskulelærar i Rakkestad. I folketeljinga 1900 bur familien på Gjulum skule der.[4] I 1910 tok kona att på odel gardsbruka Sygard Faukstad (gnr. 194.) og Nedre Faukstad (gnr. 194.9) i Heidal, og Christi fekk lærarstilling der i bygda. Dei måtte visstnok gå frå Sygard att, og budde og dreiv deretter Nedre Faukstad, der sonen Kristian følgde etter som gardbrukar.[5]
Referansar
- ↑ Mal:Folketelling person
- ↑ Slektsforum Dis Norge.
- ↑ Hosar, Hans P. 1998:387.
- ↑ Mal:Folketelling person
- ↑ Norske gardsbruk bd. 10:348, Oslo 1953.
Kjelder og litteratur
- Digitalarkivet: Folketeljingar for Skjåk 1865, 1875, 1900.
- Digitalarkivet: Folketeljinga for Rakkestad 1900.
- Hosar, Hans P.: Skjåk bygdebok bd. 3. Historia 1798-1914. Skjåk kommune 1998.
- Norske gardsbruk bd. 10, Oppland fylke 2, Gudbrandsdalen bd. 1. Oslo 1953.
- Ættebok for Skjåk bd. I side 20-21, jf s 241.