Daniel Frederik Petersen

Johan Daniel Frederik Petersen (fødd i Kristiania 21. desember 1757, død same stad 24. september 1816) var offiser, kammerherre og eidsvollsmann. Han var kjend for iver og talent i selskapslivet og teaterverksemda i Kristiania frå slutten av 1700-talet. Som militær gjorde han seg gjeldande i krigane 1807-1808 og i juli-august 1814, i den siste som underkommandant på Fredriksten festning. På Eidsvoll tilhøyrde han sjølvstendepartiet.

Han var son av oberstløytnant, seinare stiftamtmann i Bergen Christian Petersen og Anna Larsdotter Michelsen (Ramus). Daniel Fredrik Petersen gifta seg i København 24. mai 1791 med Henriette Frederikke Scheel (1770-1851). Ho var fødd i København, dotter av geheimeråd Jørgen Erik Scheel og Anna Dorothea Ahlefeldt. Far hennar var stiftamtmann i Akershus og seinare statsminister. Ved giftemålet kom Petersen inn i høge aristokratiske sirklar i Danmark. Syster til kona var gift med prins Emil av Augustenborg, bror til prins Christian August.

Si offiserskarriere starta Petersen som sekondløytnant ved Nordenfjelske gevorbne infanteriregiment i 1773. Han skal da vore hadde i teneste i eit par år allereie, men våre kjelder opplyser ikkje kvar. Vi veit for eksempel ikkje om han hadde gått Krigsskolen. Han var i Danmark i ein tiårs periode på 1780-talet, ellers i teneste ved avdelingar i Noreg. Ved avskilen i 1814 hadde Petersen generalmajors grad. I detalj var det militære avansementet som følgjer:

• 1771: Fyrste teneste i det militære.
• 1773: Sekondløytnant ved Nordenfjelske gevorbne infanteriregiment.
• 1780: Til Danmark som sekondløytnant ved Fynske infanteriregiment.
• 1784: Premierløytnant ved Slesvigske infanteriregiment.
• 1788: Kaptein ved 2. Akershusiske infanteriregiment, fyrst ei kort stund som sjef for regimentets nasjonale artillerikompani, så sjef for Enebakkske kompani.
• 1789: Enebakkske kompani overført til 1. Akershusiske infanteriregiment.
• 1790: Kaptein ved Norske jegerkorps.
• 1801: Major ved 2. Akershusiske infanteriregiment, kommandør for regimentets 2. nasjonale bataljon og sjef for Vestre lautrvigske kompani.
• 1808: Oberstløytnant og sjef for 2. gevorbne grenaderkompani, seinare same år til Sønnafjelske infanteriregiment som bataljonskommandør der.
• 1810: Regimentskommandør ved Sønnafjelske infanteriregiment.
• 1811: Oberst og sjef for regimentet.
• 1814: Generalmajor 22. mai. Etter søknad innvilga avskil i nåde 27. september.