Didrik Arup
Didrik Arup (fødd 30. juni 1835 i Drammen, død 10. januar 1885 i Vestre Slidre) var lærarskulestyrar og prest.
Arup var son av biskop og politikar Jens Lauritz Arup og Jacobine Lovise Juliane f. Cappelen. Han vart student i 1853 og tok teologisk embetseksamen i desember 1861.
Som 27-åring vart den nyutdanna teologen styrar for den nyskipa Balestrans lærerskole som opna 10. februar 1863. Han var styrar i drygt fire år til han i 1867 vart personleg kapellan hjå soknepresten i Ringsaker. I 1876 vart han tredjeprest med ansvaret for Veldre sokn, og frå 1880 var han sokneprest i Vestre Slidre. Han døydde i 1885, knapt 50 år gamal, og dødsårska vert oppgjeven til Lungebetændelse i kyrkjeboka.
Arup skreiv i 1883 utkast til ei ny katekismeforklaring for allmugeskulen i ei tevling utlyst av Kyrkjedepartementet.
Han var gift med Ragna f. Heffner (f. 1837).
Kjelder og litteratur
- Studentmatrikkel, Kulturhistoriske databasar, Universitetet i Oslo
- Folketeljinga 1865 for Balestrand
- Folketeljinga 1875 for Ringsaker
- Geistlig Stat og Kalender for Kongeriget Norge, 3. utg. 1897, s. 79
- Ei ny katekismusforklaring, Fedraheimen 6.10.1883 (Nynorsk kultursentrum)
- Dødsfall, Ministerialbok for Vestre Slidre (Digialarkivet)
- Ragna Arup i folketeljinga 1910 for Kristiania
- Veldre kirke 1726-1926, s. 37f (NBdigital)