Herman Gerhard Treschow

Herman Gerhard Treschow (fødd 18. juli 1780 i København, død 12. februar 1836 i København) var amtmann for Nordre Bergenhus amt 1811-1814 og var ein av dei danske embetsmennene som forlet Noreg i 1814.

Treschow var son av Michael Treschow (1741-1816), assessor i Høgsterett og seinare amtmann, og Christina Elisabeth Wasserfall (1753-1823). Han gifte seg 8.10.1813 med skodespelaren Juliane Maria Funck (1786-1868).

Treschow vart student ved København universitet i 1797 og cand.jur. i 1800. Same året vart han protokollsekretær i Høgsterett, i 1804 assessor i Hof- og Stadsretten i København og i 1807 premierløytnant i Kongens livkorps.

Den 22.10.1811 vart Treschow utnemnd til amtmann for Nordre Bergenhus amt etter at Hilmar Meincke Krohg same året ikkje hadde teke imot embetet. I 1814 leidde Treschow amtsvalet til riksforsamlinga. Etter brotet med Danmark fekk han avskil med ventepengar frå embetet og flytte attende til Danmark. I Danmark hadde han fleire embete, mellom anna to amtmannsembete. Han var medlem av fleire regjeringskommisjonar.

Litteratur

• «Herman Gerhard Treschow», Dansk biografisk lexikon, bd. 17, 1903, s. 503-504. (runeberg.org)
• Weidling, Tor. (2000). Eneveldets menn i Norge. Sivile sentralorganer og embetsmenn 1660-1814. Oslo: Riksarkivaren, s. 308-309. (Digital utgåve)