Lars Olson Slettemoen

Lars Olsson Slettemoen (fødd 17. juli 1885 på stølen Kulthaug, Ustaoset, Hol kommune, dødsår ukjent) var snikkar og bonde på Vestvoll i Moen i Hol.

Foreldra var Ola Mikkelson Slettemoen (1845-1906) og Anne Olsdotter Nedremyr (1846-1940). Dei var gardbrukarar på søre Slettemoen i Moen i Hol.

Lars hadde gått på Voss Folkehøgskule og hadde også snikkarutdanning. Han gifte seg i 1916 med Marie Foss (1880-1943) frå Øvre Eiker. Ho hadde lærarutdanning og verka som lærar frå 1905-1942. Lars og Marie hadde ingen born.

Vestvoll, opprinneleg heimstøl til søre og myljo Slettemoen, var svært attgrodd da Lars kjøpte han i 1913, så det vart mykje nyrydding. For dette arbeidet fekk han Ny jords diplom. Han bygde også fleire nye hus på garden. I 1940 bygde han silo og eksperimenterte heile livet med å finne alternativ til den tradisjonelle syra, for å få sunnare fôr og dermed betre mjølk og kjøt. Han engasjerte seg også i dyrevern og var i mange år formann i Hol dyrevern.

Lars kjøpte traktor allereie i 1947. Den overlet han seinare til maskinlaget. Han var elles ein pådrivar i veg- og brubygginga i Moen, og fekk gjennomført dette som samvirketiltak. Lars engasjerte seg også sterkt i arbeidet med å få bygd det første samfunnshuset i dalen, Bygdahall, og var formann i byggenemnda for dette.

I 1949 selde han garden til brorsonen, Ola Olsson Slettemoen, men vart buande i sitt eige hus på garden.

Kjelder og litteratur

• Reinton, Lars og Sigurd: Folk og fortid i Hol. I kommisjon hos Grøndahl, 1938-1982. Bind 3.
• Medhus, Knut: Lokalhistorisk vegvisar for Holsbygda, Mogrenda, Vestlien ogHolsåsen, 1999.