Lars P. Thorkveen

Bauta til minne om St. Olav

Foto: Arnfinn Kjelland

Lars P. Thorkveen (fødd 1856 på småbruket Torekvei i Lom, død 1923 i St. James, Minnesota). Han var med og stifta Lom Samlag, eitt av dei aller første ungdomslaga i Gudbrandsdalen i 1870-åra, og i 1876-77 gjekk han Gudbrandsdalens Amtsskole. Bygdefolket såg at han var «meir enn vanleg evnerik»; han stod m.a. først på kyrkjegolvet da han vart konfirmert. Som ungdom heldt han ein gravtale over ein gamal fattig granne; denne talen hugsa folk som var til stades så lenge dei levde.

Thorkveen emigrerte til USA i 1880 og kom til West Prairie, Wisconsin. Der var han først lærar på ein norsk skule før han i åra 1883-1885 gjekk Luther College i Decorah, Iowa og 1885-87 Luther Seminary i Afton, Minnesota. I 1887 vart han prest i Albion Norwegian Lutheran congregation i Watonwan County i Minnesota, eit prestegjeld som etter kvart omfatta fire kyrkjelydar til: St. Olaf, Long Lake, Rosendale og Butterfield. Der var han prest resten av livet.

Thorkveen var mellom dei som i 1909 stifta Gudbrandsdalslaget, og han var president i laget frå stiftingsåret til han døydde. I den funksjonen redigerte han årboka for laget og tok ei rekkje initiativ til å halde oppe kontakten med heimlandet: markeringa av 300-årsjubileet for trefninga i Kringen i 1612, grunnlovjubeileet i 1914 og særleg markeringa av 900-årsjubileet for kristninga av dalen ved helgenkongen, Olav Haraldsson, i 1921. Han var òg med på stiftinga av Bygdelagenes Fællesraad i 1916.

Måleri av L. P. Thorkveen frå Luther College.

Litteratur

• Kjelland, Arnfinn 2009: Rev. Lars P. Thorkveen (1856–1923) – founding father of Gudbrandsdalslaget. Under trykking i Gudbrandsdalslaget Centennial Yearbook
• Kvaale, Olav T. 1973: Pastor L. P. Thorkveen frå Lom. Årbok for Gudbrandsdalen: 40-51.