Aslaksborgvegen

Aslaksborgvegen på Nes i Sauherad i Midt-Telemark kommune går sørover frå Nesoddvegen til snuplass på Aslaksborg ved Gvarv-elvas utløp i Norsjø. Han er om lag 1,8 kilometer lang og går gjennom jordbrukslandskap med noko skog.

Aslaksborgvegen sett vestover frå Nesoddvegen.

Foto: Roy Olsen (2018).

Vegen blei namnsett i 2009 og har namn etter brygga Aslaksborg som låg her tidlegare.

Aslaksborg brygge fekk namn etter den fyrste kapteinen på Norsjøbåtane – Aslaksen. Brygga låg rett ned for Nordre Vestgarden (gnr. 170/1) og er kjend frå tida det var stor båtferdsle på Norsjø. Her var utgangspunkt for hesteskyssen oppover bygdene i Telemark. Da båtferdsla enda her, var det gjestgjevarstad med overnatting på Vestgarden. Brygga blei nytta frå den tida båttrafikken tok til og heilt til det blei sprengt veg ved Jutulfua ved Årnes, slik at Årnes brygge kunne byggast. Ved Aslaksborg var det òg utslagsplassar for tømmer.

Sjå også

• Vegar i Midt-Telemark kommune

Kjelder

• Kartverket: Norgeskart
• Kirkeby, Birger: Bygdebok for Sauherad, band III, Sauherad kommune 1985.