Birgit Tomasgård
Birgit Tomasgård f. Grave (fødd 11. mai 1871 i Seljord, død 14. februar 1913 i Spydeberg) var husmor og gardkone.
Ho var dotter av gardbrukar og lensmann Aasmund Larsen Grave (1818–1877) og Hilleborg Jørgensdotter Grave (1830–1914). Ho var det tolvte barnet til faren, og det sjuande til mora. Faren hadde tidlegare vore gift med Ingeborg Jørgensdotter Grave (1822–1851), som var syster til Hilleborg, og fekk fem born med ho. Dei eldre halvsøskna til Birgit var soleis óg søskenborna hennar.
Ho vart i 1896 gift med lærar Andreas Olai Tomasgård (f. 1875) og dei fekk to born. I 1900 budde dei i Nordahl Bruns gate i Kristiania. Sonen Kåre vart fødd der året etter, men då hadde dei allereie flytt til Spydeberg og budde på Heli skole. Dottera Hilleborg Ragnhild vart fødd der i 1903. I 1910 budde familien på garden Nordre Heli i Spydeberg, og han var då ikkje lenger berre lærar, men óg gardbrukar og kyrkjesongar. Men då var Birgit sjuk, for sjølv om ho var heime på teljingsdagen, står det at ho til vanleg budde på Gaustad asyl.
Ho døydde på Gaustad asyl berre 41 år gamal i 1913 av lungebetennelse kombinert med tuberkulose.
Både Birgit og fleire andre i familien hennar er omtala i brevvekslinga mellom Ivar Kleiven og Kristian Prestgard.