Isflå (Stranda gnr. 98)
| Isflå | |
|---|---|
| |
| Garden Isflå ligg til høgre (syd) for Isflåelva og Isflåkoppen | |
| Alt. namn: | Hirtsflåen |
| Sokn: | Sunnylven |
| Fylke: | Møre og Romsdal |
| Kommune: | Stranda |
| Gnr.: | 98 |
| Postnummer: | 6200 |
Isflå er matrikkelgard nr. 98 i Stranda kommune. Garden ligg på austre side av Sunnylvsfjorden mellom Smogeli i Fjord kommune i nord, og Stokke i Stranda kommune i sør.
Eigarar
Garden var tidleg på 1600-talet krongods, og gjennom krongodssal kring 1650 og gjennom seinare videresal var garden i 1659 eigd av M. Peder og arvingane etter Ludvig Munthes.
Lensmann Peder Pedersen Langlo vart eigar frå 1720. Etter hans død i 1729 vart garden delt i to like arvepartar. Parten til enkja Birgithe vart i 1765 seld til presten Ebbe Carsten Tønder. Dottera Marie, gift med futen Ole Olsen Alsing[1] arva andre parten. Lensmann Knud Slyngstad kjøpte denne parten i 1791 etter skiftet av fru Alsing. I skiftet etter Knud Slyngstad i 1815, vart dottera Sigrid eigar. Ho vart 1817 gift med Ole Hansen Myklebust, og han selde denne parten til Ole Olson Isflå i 1818. Ole Olson skøytte så i 1837 til sonen Ole Andreas Olson Aasen, og etter sistnemnde sin død i 1855, skøytte enkja denne parten i 1856 til Rasmus Olson Ytre Åkernes og Jacob Jacobsen Indre Åkernes. I 1860 kjøpte så Ole Martinus Olson Aasen tilbake denne parten, som tilsvarte bruk 1. Etter Ole Martinus sin død skøytte døtrene, Gunhild og Ingeborg i 1908 til Tore Ole-Severinson Øye, som også hadde kjøpt bruket deira i Åsen, Kvia.
Det andre bruket vart etter Ebbe Carsten Tønder sin død i 1785 overteke av enkja Susanne og etter skiftet etter henne i 1830, vart bruket kjøpt av Anders Pederson Isflå. Han skøytte så vidare i 1840 til Christian Hagen på Stranda. Tomas Øvstegård kjøpte så dette bruket i 1919 av Christian Hagen, barneborn til den tidlegare eigaren Christian Hagen.
Brukarar
- 1606-10 Oluf
- 1611-30 Siffuer
- 1631-35 Jon Haagenson
- 1635-ca. 1655 Låg aude, brukt av Ole og Knud Opshaug som hamn/utmarksslått
- ca. 1655- Knut Sivertson
- ca. 1690- Peder Knutson
- 1722-28 Peder Anderson
- 1731- Peder Arneson
- 1733-41 Anders Arneson
- 1741- Vart atter delvis liggjande aude og brukt som hamn/utmarksslått. På denne tida kom der busetnad på Skjeret, så det er naturleg å dele garden i to bruk.
Bruk 1 (Hovudbruket)
- 1800-26 Ole Olson
- 1826- Anders Pederson
- ca. 1830- Peder Olson
Bruk 2 (Skjeret)
- nemnd 1739 Stener
- nemnd 1756 Albrigt
- nemnd 1762 Halvor Rasmussen
- nemnd 1791 Ingebrigt Olson
- 1805-26 Knut Haagenson
- 1826-27 Anders Sivertson
Litteratur
- Gjerding, Jørgen. Øydebruk i Sunnylven og Geiranger. Utg. Eige forlag. Hellesylt. 1935. Digital versjon på Nettbiblioteket.
- Kjølås, Gerhard: Stranda bygdebok I Gard og Grend, Molde 1954
- Lillebø, P.A.. Sunnylven og Geiranger. Utg. Stranda sogelag. Stranda. 1993. Digital versjon på Nettbiblioteket.
Koordinater: 62.210272° N 7.0393967° Ø
- ↑ Ole Alsing og Osen Jarnverk. Utg. Molde bymuseum. 2018. Digital versjon på Nettbiblioteket.