Skogsøya (Øksnes)
Skogsøya er ei øy i Øksnes kommune i Nordland. Ho ligg vest og nord for Langøya. Skogsøya er den største av øyane vest i kommunen, med eit areal på 32,5 km². Det høgaste punktet på øya er Stigkollen på 707 moh. Øya hadde 26 innbyggjarar i 2017.
Det er ti matrikkelgardar på øya, mellom dei Øksnes prestegard og Breistrand.
Skogsøya var tidlegare sentrum i Øksnes kommune. Staden Øksnes ligg på Skogsøya, og øya hadde på 1930-talet mellom 400 og 700 fastbuande. Då meir og meir kommunikasjon byrja å gå på landevegen framfor med båt, flytta administrasjonen over til Myre. Da kommunane Øksnes og Langenes vart slått saman igjen i 1964, heldt storkommunen namnet Øksnes etter kyrkjestaden på Skogsøya.
Sør på Skogsøya går det om lag 6 km kommunal veg mellom Hjellsand og Øksnes. Vegen vart opphaveleg bygga etter ein organisert aksjon frå kvinnene på øya.[1]Frå Øksnes er det hurtigbåtsamband til Myre, Smines og Skjellfjord på Langøya.
12. november 1988 stranda den utrangerte russiske jagaren «Boiky» på grunt vatn utanfor Hjellsand på Skogsøya medan det var under slep frå Murmansk til Spania for opphogging. Vraket låg lenge delvis synleg utanfor øya, og vart ein lokal turistattraksjon. Men vraket vart endeleg hogt opp og fjerna i 2001.
Forfattaren Herbjørg Wassmo vart fødd og voks opp på Skogsøya. Salmediktar Magnus Brostrup Landstad har òg budd på øya.
25. januar 1893 omkom 26 fiskarar frå Skogsøya i ein storm. Over 100 andre fiskarar omkom i uvêret elles i Vesterålen og Lofoten same dag.
Referansar
- ↑ Veien på Skogsøya – et kvinnenettverk i aksjon www.kvinnehistorie.no
Kjelder
- Skogsøya på Wikipedia på nynorsk
- Borgos, Johan I.. Gård og slekt i Øksnes. Utg. Øksnes historielag. Myre. 1992. Digital versjon på Nettbiblioteket.