Smart Møbeltapetsererverksted

Smart Møbeltapetsererverksted var ei møbelbedrift i Sykkylven som var i verksemd nokre år etter andre verdskrigen. Grunnleggaren Gerhard Ringdal dreiv først, frå 1940 til 1946, ein leiketyfabrikk der han laga ymse dyrefigurar på hjul. I leiketyfabrikken var det tre-fire tilsette og varene dei laga vart selde til butikkar i Ålesund. Til leiketyproduksjonen leigde han lokale i Nikkoline Lyshol sitt hus i Aure sentrum.

Like etter krigen bygde han bustadhus på ei tomt som var utskild frå Jangarden på Aure. Der innreidde han verkstad i kjellaren og tok opp møbelproduksjon. Det var tre eigarar i Smart: Ole O. Woldstad, Lars Hagen og Gerhard Ringdal.

Bedrifta var etter tilhøva godt utstyrt. Ho var mellom dei første som fekk levert putestappemaskin frå Alfred Nyborg Maskinfabrikk AS. Frå midten av 1950-åra produserte bedrifta ein modell med støypt plastkjerne.

Eigarane og dei to tilsette hadde rikeleg med oppgåver til eit godt stykke ut i 1950-åra. Kring 1960 vart verksemda lagt ned.

Kjelde

• Høidal, Eldar: Industrisoge for Sykkylven. Sykkylven 1990. Digital versjon på Nettbiblioteket