Tilbakevandring frå Nord-Amerika
Tilbakevandring frå Nord-Amerika har vore eit underutforska tema. Det er rimeleg godt kjent kor mange som utvandra permanent, men ein veit svært lite om kor mange som kom tilbake. Grunnen til det er mangel på kjelder.
Ein tilbakevandrar kan definerast som ein person som hadde permanent flytting som mål med utvandringa, men som returnerte permanent. Dette vil altså vere menneske som ikkje reiste ut for å tene pengar for så å returnere og finne seg levebrød att heime.
For utvandringa til oversjøiske land har vi taloppgåver tilbake til 1825. Men det var ikkje før i 1946 at det vart innført plikt til å melde frå alle flyttingar inn- og ut av landet til folkeregisteret. Statistisk sentralbyrå prøvde seg på ein innvandringsstatistikk frå 1916, men måtte gi opp frå 1931 til flytteregistreringane frå 1946 gav grunnlag for å begynne igjen i 1947.
I folketeljingane i 1910 og 1920 skulle alle rett nok oppgje om dei hadde vore i Nord-Amerika, men svara på det spørsmålet var så upresise at statistikken ikkje kan brukast.
Nokre tilbakevandrarar kan ein finne i kategorien Hjemvendte norsk-amerikanere.